رَسانک نیوز

یکشمبهئے بانگواها ۱۸ شهریور ۱۴۰۳، یک جهمنندێن بلۆچے سلاهبندێن مردمانی دستا هورآپئےهلکا پهرهئے دمگان تیرانی آماچ بوتگ و وتی ساهی چه دستا داتگ.

اے بلۆچێن جهمنندئے پجّار (اَلی بلۆچی)، کساس ۲۰ سالگ، شهدۆستئے چُکّ و تاج مهمد هانی کلّێنکئے هلکئے مردم چه پهرهئے دمگان گوَشگ بوتگ.

گێشێن هالانی رِدا، کساس ساهت یکّا سلاهبندێن مردمان هورآپئے هلکا اَلیئے نێمگا که گۆن زاتی موتورئے گۆما رئوگا بوتگ‌اَنت تیرگواری کُرتگ که آییا گۆن تیرئے لگّگا مان سرا، وتی ساه چه دستا داتگ.

چه جنۆکانی جنَگئے سئوب و آیانی پجّارا تان انّون هچ هالے نێست.

گۆن ۲۰۲۳ئے سالئے جم کُرتگێن هالان، کم چه کم ۱۹۲ جهمنندێن بلۆچ نامالومێن سلاهبندێن مردمانی تیرانی آماچ بوتگ‌اَنت که آیانی تها ۱۵۰ کس کُشگ بوتگ و ۴۲ کس ٹپّیگ بوتگ. اِشانی تها کم چه کم پنچ گونڈوێن چُکّ و چار جنێن هم هست‌اِنت.