رَسانک نیوز

دوشمبهئے بانگواها ۱۹ شهریور ۱۴۰۳، کم چه کم شش بلۆچئے اێدامئے هُکم که یکّے چه آیانی اپگانستانئے مردم بوتگ و دراهێن ۱۷ شهریورا بندیگئے اێوکێن جاها برگ بوتگ‌اَنت بندیگئے اُگدهدارانی دستا اجرا کنگ بوتگ.

اے بندیگانی پجّار (سعید هسن زهی)، ۳۰ سالگ، تاج مهمدئے چُکّ، سور کُرتگێن، سئے چُکّئے پت و دُزآپئے نندۆک، (پرزاد سنچولی)، ۲۹ سالگ، گلامئے چُکّ، سور کُرتگێن و سئے چُکّئے پت و زابلئے مردم و دُزآپئے نندۆک، یکّے دگر گۆن (رۆدینی) هلکی ناما، دُزآپئے نندۆک، یک اپگانستانئے مردمی گۆن (گۆن نورمهمد نورزهی)ئه پَجّارا، سئیدمهمدئے چُکّ، سور کُرتگێن و چُکّ دار اپگنستانئے سرڈگارشے مردم چه نێمروزئے ولایتا گوَشگ بوتگ.

گێشێن هالانی رِدا، سعید ۱۳۹۹ئے سالا مئوادئے جُرما آییئے لۆگئے سرئے اُرش برگئے گۆما شهید مزاریئے هئیابانا مان دُزآپا آوار جنگ و چه دُزآپئے انگلابئے آمیدگسا اێدامئے واستا مهکوم کنگ بوتگ.

پرزاد چار سال پێش گۆن لهتے جُرما زابلا دزگیر کنگ و اے شهرئے انگلابئے دادگاها په اێدامئے واستا مهکوم کنگ و دو سال پێش دُزآپئے مرکزی بندیگا برگ بوتگ که یکشمبهئے سُهبا ۱۸ شهریور پد چه ابندیگئے اُگدهدارانی گوانکا وتی آهری گند و نند گۆن وتی هلکئے مردم کُرتگ.

نورمهمد هم ۱۴۰۱ئے مردادا، میلکئے سیمسرا زابلئے شهرا گۆن مئوادئے جُرما آوار جنگ و زابلئے انگلابئے آمیڈگسا اێدامئے واستا مهکوم کنگ بوتگ و ۱۴۰۲ئے هُردادا، دُزآپئے مرکزی بندیگا برگ بوتگ.

چه اے دگه بندگانی پجار و جُرما که گوَشگ بوتگ بلۆچ اَنت تان انّون هچ هالے نێست.

گوشگ ببیت که ۲۰۲۳ ئے سالا کم چه کم ۱۸۴ بندیگیێن بلۆچ گۆن وڑ وڑێن جُرمان اێرانئے ۲۶ دگه دگه جاهێن شهران که دُزآپ گۆن ۵۴ کس و بیرجند گۆن ۳۱ کس گێشترێن ابێد انسانی هُکما اێدامئے هُکما مهکوم کنگ و اێدام کنگ بوتگ‌اَنت که اِشانی تها کساس چار جنێن هم هست.