رَسانک نیوز

شَمبِهئے شپا ۱۰ شهریور ۱۴۰۳، نیمبلوک و کاینئے راها چه زربانی هراسانئے اُستانئے دمگان یک ٹێلکشّێن ماشینیا گۆن دُزآپ و مشهدئے اتوبوسئے گۆما ڈیکّر وارتگ، دو کس چه ٹێلکشّێن ماشینئے نندۆکان ٹپّیگ بوتگ‌اَنت و یکّیئے هال سکّ هراب اِنت.

چه اے دوێن ٹێلکشّانی پَجّارا که گوَشگ بیت زابلئے مردم اَنت تان انّون هچ هالے نێست.

اے وئیل کساس شپئے ساهت دها پێش آتکگ و ٹێلکشّێن سئواری ماشینا گۆن اتوبوسا ڈیکّر وارتگ و دو کس ٹپّیگ بوتگ و شاگردئے هال سکّ هراب اِنت که دوێن ٹپّیگ بوتگێن مردم آمبولانسئے گۆما کاینئے نادراهجاها برگ بوتگ‌اَنت.

گێشێن هالانی رِدا که چه ائولئے ۲۰۲۳ئے سالا جم کنک بوتگ‌اَنت، کم چه کم ۳۲۱ کس چه ٹێلکشّێن بلۆچان گۆن وڑ وڑێن وئیلان، کُشگ و ٹپّیگ کنگ بوتگ‌اَنت که نزامی نیروانی راستێن تیرگواریانی تها ۲۸ ٹێلکشّا وتی ساه چه دستا داتگ و ۱۷ کس ٹپّیگ بوتگ. جادهی وئیلانی تها هم ۱۹۴ کس ٹپّیگ بوتگ. نامالومێن مردمانی تیرگواریان هم ۸ کسا وتی ساه چه دستا داتگ و ۲ کس ٹپّیگ بوتگ. دگه وئیلانی تها چۆ هار، آس سۆچی ٹێلئے ڈیپوئے تها و یک دگه نامالومێن مئوردے تها هم کم چه کم ۱۴ کس ٹپّیگ و بێران بوتگ.