رَسانک نیوز

دوشمبهئے بانگواها ۵ شهریور ۱۴۰۳، (برکت اَلی سنجرانی) بلۆچێن بندیگئے اێدامئے هُکم که پێسرا په کتلئے (قتل) جُرما په اێدامئے هُکما مهکوم کنگ بوتگ و شَمبِهئے رۆچا ۳ شهریور دُزآپئے مرکزی بندیگا، په هُکمئے اجرا کنگئے واستا اێوکێن بندیگا برگ بوتگ، اجرا کنگ بوتگ.

(برکت اَلی سنجرانی)، کساس ۲۵ سالگ، مهمد هئیاتئے چُکّ، سور کُرتگێن و دُزآپئے نندۆک گوَشگ بوتگ که چار سال پێش یکجاهی جنگیئے تها کتلئے جُرما دزگیر کنگ و چه آمیدگسا اێدامئے هُکما مهکوم کنگ بوتگ.

گوَشگی اِنت برکت اَلی، سئے شمبه ۱۶ مرداد ۱۴۰۳، په اێدامئے هُکمئے اجرا کنگئے واستا دُزآپئے مرکزی بندیگا، اێوکێن بندیگا برگ بوتگ که چارشمبه ۱۷ مرداد ۱۴۰۳، په اِشیئے واستا که چه مگتولئے لۆگئے مردمان رِزایت بگریت دُزآپئے آمێن بندیگا برگ بوتگ و رند چه اِشیا که آمێن بندیگا برگ بوتگ گۆن یک تلپئونی پایلیئے گۆما گوشتگی که من (بێگناهے آن).

آییا اے پایلئے تها که مجازی دنیایا شِنگ بوتگ گوشیت: کساس سئے سال پێش یک جنگیئے تها که چه ده کسا گێش هۆر بوتگ‌اَنت، کُشگ بوتگێن مردئے مردم شر زاننت که کُشۆگ من نه آن، کُشگ بوتگێنے پتا آگاهی ادارهئے تها گۆن من کئول و کرار کُرت و منا گوَشتی که بمَنّ و شش ماهئے تها ما رِزایت دئیێن که چه بندیگا آزات ببئے و هچ نیاز په اسپێت ریش و واجهێن مردمانی پادرنیامیا نێست. من زانان که تئو گاتل نه‌ائے و چه کُشگ بوتگێن مردمان لۆٹان که گۆن منی کُشگئے گۆما وتی چُکّئے شهید بئیگا هراب مکننت. بێگناها من بندیگایان و زجر کشگایان گوَستگێن رۆچا منا اێدامئے واستا بُرتگِش که من مُرتگ و زندگ بوتگان همدا زانت که من کاتل نه‌آن.

گوشگ ببیت که ۲۰۲۳ ئے سالا کم چه کم ۱۸۴ بندیگیێن بلۆچ گۆن وڑ وڑێن جُرمان اێرانئے ۲۶ دگه دگه جاهێن شهران که دُزآپ گۆن ۵۴ کس و بیرجند گۆن ۳۱ کس گێشترێن ابێد انسانی هُکما اێدامئے هُکما مهکوم کنگ و اێدام کنگ بوتگ‌اَنت که اِشانی تها کساس چار جنێن هم هست.