رَسانک نیوز

چارشمبهئے رۆچا ۳۱ مرداد ۱۴۰۳، گۆن سلاهبندێن مردمانی راستێن تیرگواریان دو نۆک‌ورناێن بلۆچئے نێمگا سمد آبادئے هلکا واشئے شهرا که سلاهبندێن مردم ماشینیا سئوار بوتگ‌اَنت سئوب بوتگ که دوێن نۆک‌ورنا ٹپّیگ و بێران ببنت.

بێران بوتگێن ورنائے پجّار (دانیال مهمودزهی)، ۱۴ سال انتی، مسلمئے چُکّ و ٹپّیگ بوتگێن نۆک‌ورنائے پجّار (بهادر درازهی)، ۱۷ سال انتی، لتیپئے چُکّ، هر دوێن میرزا آبادئے هلکئے نندۆک چه واشئے دمگان اِنت.

همے هالئے رِدا، کساس شپئے ساهت هشتا یک سواری ماشینیئے نندۆکان، دو نۆک‌ورناێن بلۆچ که جادهئے کِرّا بوتگ‌اَنت تیرانی آماچ کرتگ‌اَنت که دانیال گۆن تیرئے ورگا دلئے سرا وتی ساهی چه دستا داتگ و بهادر گۆن تیرئے ورگا سێنگئے سرا ٹپّیگ بوتگ و واشئے نادراهجاها برگ بوتگ.

چه سلاهبندێن مردمانی جنَگئے سئوب و آیانی پَجّارا تان انّون هچ هالے نێست.

گۆن ۲۰۲۳ئے سالئے جم کُرتگێن هالان، کم چه کم ۱۹۲ جهمنندێن بلۆچ نامالومێن سلاهبندێن مردمانی تیرانی آماچ بوتگ‌اَنت که آیانی تها ۱۵۰ کس کُشگ بوتگ و ۴۲ کس ٹپّیگ بوتگ. اِشانی تها کم چه کم پنچ گونڈوێن چُکّ و چار جنێن هم هست‌اِنت.