رَسانک نیوز

چارشمبهئے رۆچا ۱۷ مرداد ۱۴۰۳، چُنت ٹێلکشّێن ماشینئے دُمبال دئیگ و نزامی نیروانی اُرُش برگ و تیرگواری گنجک و کلندانیئے هلکئے سرا چه زرآبادئے شهرئے دمگان کم چه کم دو جهمنند چا گنجکئے مردمان تیر وارتگ و ٹپّیگ بوتگ‌اَنت.

دوێن ٹپّیگ بوتگێن جهمنندانی پجّار (شه‌بکش دهشتی)، ۴۲ سالگ، نورمهمدئے چُکّ و (مهمود جنگانی)، کساس ۵۰ سالگ، گلام مهمدئے چُکّ گوَشگ بوتگ.

همے هالانی رِدا، نزامی نیرو گئرکانونیێن درۆشمیا چه وتی بُنپانیئے جاها که جاسک‌اِنت در کپتگ‌اَنت، جهمنندانے که چه ٹێلکشّانی آوار جنگئے دێمیگیری کُرتگ تیرگواریِش کُرتگ که اشیئے سئوبا دو جهمنندێن بلۆچ چا گنکئے هلکا چه زرآبادئے شهرا ٹپّیگ بوتگ‌اَنت.

گوشگی اِنت که ٹپّیگ بوتگێن جهمنند هاتمُ الانبیائے نادراهجاها برگ و مداوا کنگ بوتگ‌اَنت.

گوَشگ ببیت که گۆن سالئے جم کُرتگێن هالان، ۲۰۲۳ئے سالا کم چه کم ۳۲۱ ٹێلکش گۆن نزامی نیروانی راستێن تیرگواریان، جادّهی وئیلان، نامالومێن سلاهبندێن مردمانی تیرگواریان، هار و آس سۆچیان بێران و ٹپّیگ بوتگ‌اَنت.