رَسانک نیوز

چارشمبهئے رۆچا ۱۷ مرداد ۱۴۰۳، ۹ سالگێن بلۆچ (امیرهمزه پولادی) مُتسنگئے هلکئے مردم نێکشهرئے دمگئے جهمنندئے یک ماهے چه آییئے بێگواه بئیگا گوَستگ و تان انون هچ هبر و هالے چه آییا نێست.

همے وهدئے تها بازێنے چه اے هلکئے مردم و بلۆچستانئے جاه جاهانی مردمانی کۆشست په امیرهمزهئے درگێجگئے واستا بله آیانی آسرات بے پایده بوتگ‌اَنت و دئولتی امرگان که گۆن مردمانی پگرانی پشارئے گۆما اے بنگپئے تها آتکگ‌اَنت هم ابێد امکانات و اے دگه مردمانی دابا گۆن هالیگێن دستا چُنت رۆچا گۆن مردمانی گۆما هئوار بوتگ‌اَنت.

گوشگی اِنت که امیرهمزه و پرهاد تیرماهئے ۱۶می رۆچا رَند چه اِشیا که چه دینی وانگجاها چُٹّی بوتگ‌اَنت کهیریئے هلکئے رئوگا که امیرهمزهئے پت اۆدا اِنت، چه مُتسنگئے هلکا نێکشهرئے دمگان درآتکگ‌اَنت و پرهادئے گوشگانی سرا، امیرهمزه راهئے نیاما دمی بُرتگ و چه آییا لۆٹتگی تان کُمکئے آرگئے واستا هلکا برئوت و وهدے که مردم آیانی جُتا بئیگئے جاها شتگ‌اَنت، هچ پدے چه امیرهمزها نبوتگ.