رَسانک نیوز

جُمَهئے رۆچا ۱۲ مرداد ۱۴۰۳، یک بلۆچێن ٹێل بها کنۆکے هئیابانئے کِرّا نامالومێن سلاهبندێن مردمانی دستا چهبارئے شهرا یخ سازیئے چار راها تیرانی آماچ بوتگ و وتی ساهی چه دستا داتگ.

اے بلۆچێن جهمنندئے پجّار (یهیا هُسئین زهی) کساس ۲۵ سالگ، کریم بکشئے چُکّ و سپرزهیئے هلکئے نندۆک چه دشتیاریئے شهرئے دمگان گوَشگ بوتگ.

همی هالانی رِدا، نامالومێن سلاهبندێن مردم چه یک ماشینیئے تها یخ سازیئے چار راها یک جهمنندیئے نێمگا که هئیابانئے کِرّا ٹێل بها کنگ بوتگ گۆن کمری کُلتا راستێن تیرگواری کُرتگ که آییئے گۆن یک تیرئے ورگا سرئے نێمگا وتی ساهی چه دستا داتگ.

چه جنۆکانی جنگئے سئوبا تان انّون هچ هالے نێست.

گۆن ۲۰۲۳ئے سالئے جم کُرتگێن هالان، کم چه کم ۱۹۲ جهمنندێن بلۆچ نامالومێن سلاهبندێن مردمانی تیرانی آماچ بوتگ‌اَنت که آیانی تها ۱۵۰ کس کُشگ بوتگ و ۴۲ کس ٹپّیگ بوتگ. اِشانی تها کم چه کم پنچ گونڈوێن چُکّ و چار جنێن هم هست‌اِنت.