سربازا دو ماشینئے ڈیکر ورگ سئوبا کم چه کم دو نۆدربر ٹپیگ بوتگ

رَسانک نیوز

چارشمبه رۆچا ۱۸ بهمن ۱۴۰۲، ٹێلکشێن ماشینیئے ڈیکّر ورگ گۆن نۆدربران، باتکئے هلکا سربازئے دمگان که سئوب بوتگ دو نۆدربرئے ٹپّیگ بئیگئے سئوب بوتگ.

انگت چه اے نۆدربرانی پجّارا هچ هالے دستا نێست بله گۆن آمبولانس سرباز کلاتئے نادراهجاها برگ بوتگ‌اَنت.

گۆن اے رستگێن هالا، اے نۆدربر سرویسئے نبئیگئے سئوبا ناچار بوتگ‌اَنت که گۆن راهگوزێن ماشینان وتی لۆگا برئونت که راهئے تها اِشانی ماشین گۆن ٹێلکشێن ماشینیا ڈیکّر وارتگ.

همے وڑا باتکئے اورژانسئے مرکزئے آمبولانسئے هرابیئے سئوبا و اے نادراهجاهئے داکترئے نێستیئے سئوبا، رَند چه سرباز پُهلئے آمبولانسئے راه دئیگا که گێشتر چه ۲۰ کیلومتر راه اِنت، اے نۆدربر گۆن وهدئے گوَزگا نادراهجاها برَگ بوتگ‌اَنت که سئوب بوتگ نۆدربرانی هال بدتر ببیت.

گوشگی اِنت که ۱۴۰۲ئے آزر ماهئے چارمی رۆچا، کسرکندئے تها یک مینی بوسے چپّ بوتگ و آس گپتگ که لهتێن چه آیان ٹپّیگ بوتگ‌اَنت.

انچۆ دگه انچێن پێشامدیئے تها ۱۴۰۲ئے آبان ماهئے شانزدهمی رۆچا، پنج بلۆچ نۆدربر سربازا، سرویسئے نێستیئے سئوبا ناچار بوتگ‌اَنت که گۆن ٹێلکشێن ماشینے وانگجاها برئونت، راها ماشین چپّ بوتگ و ٹپیگ بوتگ‌اَنت.