پهرہ ءَ امنیتی ٹولییا لوگ یے سرا اُرش کرتگ؛ بلوچے کُشگ ءُ یکے دگه ٹپّیگ بوتگ

رَسانک نیوز/ جمے روچ 3 مهر ماہ 1405، پهرہ ئے سرکهوران دمگ ءَ امنیتی ٹولییے لوگ یے سرا اُرش گوں بیست دکیکت ئے ٹکّر ءَ سرجم بوتگ که اے ٹکّر ءَ بلوچے کُشگ ءُ یکے دگه دزگیر کنگ بوتگ.

رَسانک ءَ کُشگ بوتگیں بلوچئے پجّار «اُبید زردکوھی»، کِساس 28 سالگ، امان‌بکش ئے چُک، آروس کرتگ ءُ پهرہ ئے سرکهوران دمگئے نندوک، دزگیر کنگ بوتگیں بلوچئے پجّار «جاسم جمالی»، کِساس 28 سالگ، ھیبتان ئے چُک، آروس کرتگ ءُ زھگانی پت ءُ گورناگ دمگئے نندوک گوَشگ بوتگ.

رَسانک ءِ ھال سرکنوکانی رِد ءَ، امنیتی ٹولی ءَ اُبید ئے لوگئے سرا ماں سرکهوران دمگ ءَ اُرش کرتگ که اے پئیما آیانی میان ءَ دو نیمگیں ٹکّر بوتگ، اے ٹکّر ءَ اُبید ءَ تیر وارتگ ءُ ساہ داتگ. ٹکّر ئے بُنگیج بوھگئے وھدا سئے دگه مردم ھم لوگ ءَ بوتگ که په دَر روگ ءَ سئوبین بوتگ اَنت. پد چه اشیا جاسم په گاڑییے سرکنگ ءَ دمگ ءَ آتکگ امنیتی ٹولی ءَ دزگیر کرتگ ءُ چیریں جاگهی برتگ.

ھمے وڑا ھال سرکنوکان ءَ گوَشتگ: اے ٹکّر ءَ یک نزامی کارمندے ھم کُشگ بوتگ، بله امنیتی سروکان ءَ داں انگتا اے بُن‌گپّ تسدیک نه کرتگ ءُ نه که اے بارئوا وتی درشانی داتگ.

داں انگتا امنیتی ٹولی ئے اے لوگئے سرا اُرش ئے پُژدر زانگ نه بوتگ.