پهرہ ءَ بلوچے بندیگے پد چه چُٹی روگ ءَ آوار جَنَگ بوتگ

رَسانک نیوز/ سئے شمبے روچ 17 شهریور ماہ 1405، پهرہ ئے رسول‌آباد دمگئے نزّیک ءَ کمال آباد ءَ «اسلم سدیکی»، بلوچے که پیسرا په امنیتی ءُ سیاسی پرمندھئے دیما دزگیر ءُ بندیگ بوتگ، انّیگیں وھدا په دگه پرمندھی ءَ بندیگ ءُ وتی ھُکما کَشّگ اِنت، سلاہ‌بندین ءُ پَجّار نه بوتگیں مردمان ءَ چه آییئے وسّوگ ئے لوگئے دیما آوار جتگ ءُ داں انگتا آییا ھچ پئیمیں ھالے سرپد ئے نیست اِنت.

اسلم سدیکی، مهمداسلام ئے چُک، 26 سالگ، آروس کرتگ ءُ دو زھگئے پت، که ویلئے روچا گوں وتی لوگ بانوک ءَ وسّوگ ئے لوگ ءَ بوتگ. دروازگ ئے توار ءَ پد آییا دروازگ پَچ کرتگ که سئے نکاب پوشیں، سلاہ‌بندین ءُ بے پجّاریں مردمان ءَ زور ئے سرا آوار جتگ ءُ وتی پژو پارس گاڑی ءَ که نمبر پلیٹی کَرّگ بوتگ سوار کرتگ ءُ چه جاھا دَر شُتگ اَنت.

سر بوتگین ھالانی رِد ءَ، اسلم ئے لوگ بانوک ءَ پد چه اے ویل ءَ اِنساپ ادارھان ءَ شُتگ ءُ اے بارئوا شکایستی داتگ. امنیتی ءُ انتزامی ادارھان ءَ اے بُن گپّ ئے رَندگیری بُنگیج کرتگ، بله داں انگتا سلاہ‌بندیں مردمانی پجّار، آییئے دارگ ئے جاگه ءُ جاور ئے بارئوا ھچ پئیمیں ھالے سرپد ئے دست نه کپتگ.

اسلم سدیکی کِساس پنچ روچ پیسر چه اے ویل ءَ چه پهرہ ئے بندیگجاہ ءَ وتی چُکّئے زات روچ ءَ په دہ روچئے چُٹی ءَ دیم دیئگ بوتگ. تاریک 23 آزر ماہ 1405 ءَ ماں پهرہ ءَ په «مهلوک ءَ په سرکار ئے ھلاپ ءَ شور دیئگ»، «سرکار ئے ھلاپیں گلان ءُ میڈیا ءَ گوں ھور بوھگ» ئے بُهتان ءَ دزگیر کنگ بوتگ. آیی 17 مهر ماہ 1402 ءَ دزاپ ءِ بندیگجاہ ءَ پہ وتی بندیگ بوھگئے زھرشانی ءَ وت کُشی ئے جُهد کرتگ، گڑسرا چارشمبے روچ 26 مهر ماہ 1402 ءَ، یک سال بندیگ بوھگئے ھُکمی وارتگ ءُ 500 ملیون زمانت ئے سرا آجو بوتگ.

رَند چه آ سالان ءَ اے بلوچ پدا ماں بندراَبّاس ءُ پهرہ ءَ دزگیر کنگ بوتگ ءُ انّیگیں وھدا پهرہ ئے بندیگجاہ ءَ وتی ھُکما گوازینگ ءَ بوتگ.

چُٹی ءِ روچان ءَ ھماں وھدا آیی آوار جنَگ بوتگ که داں انگتا ھاندان ءَ ھچ پئیمیں ھالے سرپد ئے چه آییا دست نه کپتگ.