پهرہ ءَ سلاہ بندیں مردمانی تیرگواری ءَ دو بلوچ کُشگ بوتگ

رَسانک نیوز/ چارشمبے 28 مرداد ماہ 1405 ءِ شپ ءَ، پهرہ ءَ جهمنندانی دو ٹولییے میان ءَ زاتی جیڑہ ءُ جنجالئے دوران ءَ یکی چہ دویں ٹولییے سلاہ بندیں مردمان ءَ پژو پارس گاڑی ئے سرا تیرگواری کرتگ، اے تیرگواری ءَ دو بلوچ ءَ تیر وارتگ ءُ ساہ داتگ.

رَسانک ءَ اے دو بلوچئے پجّار «اِنایت‌اللہ ابراهیمی»، کِساس32 سالگ، مهمداُمر ئے چُکّ، «اَلی اسگر پلنگی»، کِساس 33 سالگ، ھسن ئے چُک، ھر دو پهرہ ئے نندوک زانتگ.

رَسانک ءِ ھال سرکنوکانی رِد ءَ، اے دو بلوچ پهرہ ئے سجادشهر دمگئے بلوچستان روڈ ئے بُنگیج ءَ بوتگ اَنت کہ پژو پارس گاڑیئے سلاہ بندیں نندوکان ءَ آیانی سرا تیرگواری کرتگ، اے تیرگواری ءَ آیان ءَ تیر وارتگ ءُ ساہ داتگ.

ھال سرکنوکان ءَ گوَشتگ تیرگواری ءَ پد، کُشگ بوتگیں دویں مردمانی سیاد ءُ وارسان ءَ اے ویلئے پدکرد ءَ سلاہ بندیں مردمانی گاڑی بُن داتگ، اے وڑا دویں ٹولییانی میان ءَ داں چُنت ساھت ءَ ٹکّر برجاہ بوتگ ءُ پد چہ آس کُشوکین ءُ نزامی ٹولییے جاھا سربوھگ ءَ جنگ ءُ چوپ ھلاس بوتگ.

لهتیں سربوتگیں ھالانی رِد ءَ، جهمنندان ءَ دو کس چہ تیرگواری کنوکیں ٹولییا دزگیر کرتگ ءُ انتزامی ٹولییے دست ءَ داتگ اَنت. بلہ رَسانک داں انگتا نہ توانت اے ھالا تسدیک بکنت ءُ اے بارئوا پٹّ ءُ چار برجاہ اِنت.