کسرکند ءَ نزامی ءُ امنیتی ٹولییے لوگانی سرا اُرش ءِ وھدا دزگیر کنگ بوتگیں بلوچئے پجّار زانگ بوتگ

رَسانک نیوز/ جمے 23 مرداد ماہ 1405، کسرکند ئے تلنگ زِلّهئے سَریں کوچو ءُ جگرانوارو دمگان ءَ نزامی ءُ امنیتی ٹولییے پُرّیگیں لوگانی سرا اُرش ئے وھدا دزگیر کنگ بوتگیں بلوچئے پجّار زانگ بوتگ. زی بانگواہ ءَ نزامی ءُ امنیتی ٹولی ءَ گوں بے نندوکیں بالگراب ءُ دھاں گاڑی ءَ بید چہ سرکار ئے ھُکم ءَ دویں دمگانی بازیں لوگئے سرا اُرش کرتگ ءُ بلوچی ءَ دزگیر کنگ ءَ پد چیریں جاگهی برتگ.

رَسانک ءَ اے بلوچئے پجّار «پئیسل بلوچ»، کِساس 27 سالگ، جما(جمل) ئے چُک، آروس کرتگ ءُ دو زھگئے پت، کسرکند ءَ تلنگ زِلّهئے جگرانوارو دمگئے نندوک زانتگ.

رَسانک ءِ ھال سرکنوکانی رِد ءَ، امنیتی ٹولی ءَ ھماں وھدا کہ آیی لوگ ءَ واب بوتگ در چہ سرکار ئے ھُکم ءَ لوگ ءَ تها بوتگ اَنت ءُ پہ زور ءُ تُرندی ءَ دزگیرش کرتگ. اے اُرشاں سباھئے ساھت 4:30 ءِ وھدا پد چہ دو لوگئے گوں بے نندوکیں بالگراب ءَ ٹِکّ کنگ ءَ بُنگیج بوتگ اَنت. ائولسرا امنیتی ٹولی بُرزیں کوچو دمگ ءَ «رھیم ھوت» ئے لوگئے سرا کہ «پاروک لاشاری» ئے تُرو زاتک اِنت اُرش کرتگ ءُ لوگ ءَ تها بوتگ اَنت. بلہ اُرشئے وھدا رھیم ھوت لوگ ءَ نہ بوتگ.

ھمیں وھدا امنیتی ٹولی ءَ جگرانوارو دمگئے سرا اُرش کرتگ ءُ پئیسل بلوچ ءَ دزگیرش کرتگ ءُ چئیریں جاگهی برتگ. ھال سرکنوکان ءَ گوَشتگ اے اُرش ھماں وھدا کنگ بوتگ اَنت کہ لوگان ءَ چُکّ ءُ جنیں آدم واب بوتگ اَنت امنیتی ٹولییے مان رِچگ لوگئے چک ءُ جنیں آدمانی ترس ئے سئوب بوتگ.

«پاروک لاشاری»، 27 سالگ، امام بکش ئے چُک، راسکئے پیرزآباد دمگئے نندوک کہ پیشترا ماں تاریک 15 مرداد ماہ 1405 ءَ دگہ بلوچییے ھوری ءَ دشتیاری ئے سنگان دمگ ءَ چہ امنیتی ٹولییے تیرگواری ءَ ساھی داتگ.

گوَشگ لوٹیت اُرش ءَ پد سرکاری میڈیا ءَ جار جتگ رَند چہ اشیا کہ تنزیم ئے دو پدایی ماں سیستان ءُ بلوچستانئے زِرباریں دمگ ءَ کُشگ بوتگ اَنت، اے تیم ئے پَشت کپتگیں یک دگہ مردمی دزگیر کنگ بوتگ ءُ بازیں سلاہ ءُ ماں تراک ءَ کارمرز بیوکیں ساز ءُ سامانی چہ اے تیم ءَ دست کپتگ.