رَسانک نیوز/ سئےشمبے روچ 13 مرداد ماہ 1405، بلوچی کہ چہ سرباز زِلّهئے کوشکور دپ دمگ ءَ ماں تاریک یکشمبے 11 مرداد ماہ ءَ چہ وتی جند ئے لوگئے دیما بے پجّاریں مردمانی دست ءَ آوار جنگ بوتگ آییئے بے ساھیں جون چہ لنگرکنان دمگئے واڈییا دست کپتگ.
رَسانک ءَ اے بلوچئے پجّار «تاجمهمد مهمدزئی»، کِساس 60 سالگ، مهمد ئے چُک، سرباز ئے کوشکور دپ دمگئے نندوک ءُ جهمنند زانتگ.
رَسانک ءِ ھال سرکنوکانی رِد ءَ، یکشمبے روچ 11 مرداد ماہ ءَ روچئے ساھت سئیا ھماں وھدا کہ تاجمهمد وتی لوگئے دیما اُوشتوک بوتگ دو گاڑی ءَ نندوکیں مردمان ءَ آیی آوار جتگ ءُ چیریں جاگهی بُرتگ. ویلئے دو روچا پد آییئے بے ساھیں جون چہ لنگرکنان دمگئے واڈی ءَ شوہاز بوتگ.
ھال سرکنوکان ءَ گوَشتگ زوریں لٹ ءُ شاپ، سوچَگ، آسن ءُ دار ئے جَنَگ ءُ چوپَگئے پد ءُ نشان آییئے بے ساھیں جونئے سرا گِندگ بوتگ. آییئے دپ ءُ دیم ھم سکّ ءَ ٹپّیگ بوتگ اَنت. بُنگیجی ھالانی رِد ءَ تاج مهمد ءَ چہ لٹ ءُ کُٹّ ءَ ساہ داتگ.
داں انگتا آوار جنوکان ءُ کُشوکیں مردمانی پجّار ءُ آیانی سئوب زانگ نہ بوتگ.
Be the first to comment