رَسانک نیوز/ دوشمبے 20 مرداد ماہ 1405، سرباز ئے کلات بازار ءَ امنیتی ٹولی ءَ شونداری ءَ در بُرتگیں بلوچی دزگیر کرتگ ءُ چیریں جاگهی بُرتگ. اے بلوچ بید چہ سرکار ئے ھُکمئے پیش دارگ، کئسور ءُ مئیار ئے گوَشگ ءَ دزگیر کنگ بوتگ ءُ داں انگتا بے ھالے سرپد ئے اِنت.
رَسانک ءَ اے بلوچئے پجّار «مهمدسئید اربابی»، 21 سالگ، مهمداکرم ئے چُک، انزا دمگئے نندوک ءُ شوندارییے شهدر برجاھئے وانندگی زانتگ.
رَسانک ءِ ھال سرکنوکانی رِد ءَ، مهمدسئید ءَ کلاتئے بازار ءَ سادہ پوشیں امنیتی ٹولییا دزگیر کرتگ ءُ چیریں جاگهی بُرتگ. کارندگان ءَ آییئے دزگیر کنگئے وھدا نہ سرکار ئے ھُکم پیش داشتگ ءُ نہ کہ آییئے کئسور ءُ مئیار گوَشتگ.
مهمدسئید ئے ھاندان ئے نزّیکیں ھال سرکنوکان ءَ گوَشتگ گوں اشیا کہ سئید ئے ھاندان ءَ پہ ھالئے سرپد ئے دست کپگ ءَ باز رَندگیری کرتگ بلے دو روچ ءَ پد داں انگت ءَ ھچ پئیمیں ھالے سرپد ئے دست نہ کپتگ ءُ اے گپّ ءَ لوگئے مردمانی دل پریشانی گیش کرتگ.
گوَشگ لوٹیت چہ اشیا پیسرا ھم سئید سلاہ بندیں مردمانی تیرگواریئے دپ ءَ کپتگ. جمے 11 اردیبهشت ماہ 1405 ءِ شپ ءَ سلاہ بندیں مردمان ءَ آییئے لوگئے دیما، آییئے سرا گوں وتاس ءُ سی تیری ءَ تیرگواری کرتگ بلے آیی اے اُرش ءَ رکّتگ. ھمیں وڑا آییئے پت «مهمداکرم اربابی»، کہ چہ سرباز ئے شونداریں مردماں بوتگ ماں تاریک 28 شهریور ماہ 1403 ءَ بندان دمگ ءُ سرد ھانگئے میان ءَ سلاہ بندیں مردمانی تیرگواریئے دپ ءَ کپتگ ءُ پد چہ تیر ئے ورگ ءُ گاڑیئے لیٹ ورگ ءَ ساھی داتگ.
Be the first to comment