دُزاپ ءَ نوک ورنائیں بلوچی سئے روچ ءَ پد چہ اشیا کہ سلاہ بندین ءُ بے پجّاریں مردمان ءَ آوار جتگ، آجو بوتگ

رَسانک نیوز/ 14 مرداد ماہ 1405 ءِ شپ ءَ، نوک ورنائیں بلوچی «پرزین کهرازھی»، 18 سالگ، آبد ئے چُک، دُزاپ ءِ جهمنند کہ سئے روچ پیسرا چہ دُزاپ ءَ سلاہ بندین ءُ پجّار نہ‌ بوتگیں مردمان ءَ آوار جتگ، آجو بوتگ ءُ وتی ھاندان ءَ پدترّتگ.

رَسانک ءِ ھال سرکنوکانی رِد ءَ، یکشمبے 11 مرداد ماہ 1405 ءِ شپ ءَ ساھت 19:50 ءِ وھدا پژو گاڑی ئے نندوکان ءَ چہ آییئے ھاندان ءَ باج ءُ زوریں زرّ ئے گرگ ئے ھاترا چہ دُزاپ ءِ زیباشهر دمگئے البرز روڈ ءَ آوار جتگ.

اے نوک ورنا چارشمبے شپ ءَ پد چہ سئے روچ ءَ چہ آوار جنوکیں مردمانی دست ءَ آجو بوتگ ءُ لوگ ءَ پدترّتگ. داں انگت ءَ آییئے آجو بوھگ ئے وڑ ءُ پئیم، دارگئے جاگہ ءُ آوار جنوکانی جاور ئے بارئوا اَلّمیں ھالی دست نہ کپتگ.

ھال سرکنوکان ءَ گوَشتگ بُنگیجی ھالانی رِد ءَ، اے نوک ورنا ئے ھاندان ءَ آوار جنوکیں مردمان ءَ پجّاھِش آورتگ ءُ گوَشنت آییئے آجو کنگ بید چہ جول ئے دیئگ ءُ گوں دمگئے کماشیں مردمانی میانجی گری ءَ بوتگ. بلہ ھال وشّ داں انگتا نہ توانتگ اے ھالا تسدیک بکنت ءُ پٹ ءُ چار اے درگت ءَ برجاہ اِنت.

اے آوار جنگ ھماں وھدا پیش آتکگ کہ انّیگیں ماھانی تها آوار جنگئے ویل ءُ واک ماں سیستان ءُ بلوچستانئے بازیں دمگان ءَ گیش بوتگ، کہ مهلوکئے دل پریشانی ءَ ھم اے بابت ءَ گیشی کرتگ.