واش ئے ناسری دمگ ءَ امنیتی ٹولییے تیرگواری ءَ کُشگ بوتگیں دو بلوچئے پجّار زانگ بوتگ

رَسانک نیوز/ پنچشمبے 8 مرداد ماہ 1405، واشئے ناسری دمگ ءَ چہ امنیتی ٹولییے پراید گاڑییے سرا تیرگواری ءَ کُشگ بوتگیں دویں بلوچانی پجّار کہ برات بوتگ اَنت زانگ بوتگ۔ ماں اے کارواییا پنچ امنیتی گاڑی ءَ گوں سادہ پوشیں کارمندان ءَ بهر زورتگ.

اے دو بلوچئے پجّار «ابدلمالک ریگی (گنگوزھی)»، کِساس 30 سالگ، آروس کرتگ ءُ آییئے برات «اسماییل ریگی (گنگوزھی)»، کِساس 22 سالگ، دادمهمد ئے چُک، ھر دو بُندر ءَ تپتان ءِ کلہ شهتوت دمگئے نندوک ءُ شستون ئے جهمنند زانگ بوتگ.

اے ھالئے رِد ءَ، اسماییل لوگئے نگن آروک بوتگ ءُ گوں وتی برات ابدلمالک ءِ ھوری ءَ لوگئے مالی جنجالانی دیمی داشتگ۔ اے براتانی کُشگ ءَ رَند آیانی لوگئے مردمانی مالی جنجال گیش بوتگ اَنت.

پیسرا رَسانک ءَ ھال سر کرتگ کہ دمگ ءَ اُوشتوکیں نزامی ٹولییا بید چہ جار ءُ دلگوش دیئگ ءَ پراید گاڑیئے سرا تیرگواری کرتگ۔ ڈریور رَند چہ دہ متر راھا، گاڑییے کنٹرولی چہ دست ءَ داتگ ءُ گاڑی گوں بند ءَ ٹوکر وارتگ ءُ اُوشتاتگ۔ ھمیں وھدا گاز ئے شرکت ئے نیسان باری گاڑی ءُ یک پژو پارسیا ھم تیر لگّتگ۔ پژو پارس گاڑی تیر ئے لگّگ ءَ رَند پہ در روگ ءَ سوبیں بوتگ ءُ گاز ئے شرکت ئے گاڑی تیر لگّگ ءَ پد، اُوشتاتگ ءُ بازیں دگہ تیری چہ پدئیں نیمگ ءَ ھم وارتگ.

چمّاں وت دیستگیں مردمانی رِد ءَ، پد چہ پراید گاڑییے اُوشتگ ءَ نزامی ٹولییا چہ دور ءُ بید چہ اشیا کہ گاڑی ءَ نزّیک ببنت گوں کریب دہ گرانین ءُ نیم گرانیں سلاہ ءَ تاں چُنت دکیکت ءَ پراید گاڑییے سرا تیرگواری کرتگ۔ ھمیں وڑا پراید گاڑیا باز تیر لگّتگ ءُ جاھا نزّیکیں لوگئے دروازگ ءَ ھم تیر لگّتگ بلے لوگا نندوکیں مردمان ءَ نُکس نہ بوتگ.

گوَشگ لوٹیت کہ پراید گاڑییے دویں نندوکیں مردم سلاہ بند نہ بوتگ ءُ آمی مردم بوتگ اَنت کہ ماں ھماں بُنگیج ءَ تیرِش وارتگ ءُ ساھِش داتگ۔ بلے تیرگواری پہ دگہ چُنت دکیکت ءَ انگت برجاہ بوتگ۔ اے کاروایی دمگئے نندوکیں مردمانی زھرشانی ءَ گوں ھوار بوتگ۔ چمّان وت دیستگیں مردمان ءَ گوَشتگ نزامی ٹولی ھچ کس ءَ نہ ھِشتگ پراید گاڑیا نزّیک ببیت ءُ کُشگ بوتگیں دویں مردمانی بے ساھیں جوناں گوں وت ءَ بُرتگ.