تپتان ئے چاہ اھمد دمگ ءَ نزامی ءُ امنیتی ٹولییا اُرش کرتگ؛ پہ ھژم ءُ تُرندی ءَ ھشت بلوچ دزگیر کنگ بوتگ

رَسانک نیوز/ زی سئےشمبے روچ 6 مرداد ماہ 1405 ءِ بانگواہ ءَ، رَسانک ءِ پیسریگیں گزارش ماں 17 تیر ماہ ئے رِد ءَ، دُزاپ ءَ سپاھئے چیریں ادارھئے ماڑیا پہ تپتان ءِ نازیل ءُ دزاپ ءِ نسرت آباد زِلّهان ءَ نزامی کارواییا برجم داشتگیں دیوان ءَ پد، دھاں نزامی ءُ امنیتی کارندگ گوں نزامی ءُ زاتی گاڑیانی کارمرز کنگ ءَ تپتان ءِ نازیل دمگئے سرا اُرش کرتگ ءُ پہ زور ءُ ھژم، بید چہ سرکار ئے ھُکم ءُ کئسور ءُ مئیار ئے گوَشگ ھشت بلوچ ءَ دزگیرِش کرتگ ءُ چیریں جاگهی برتگ.

دزگیر بوتگیں مردمانی پجّار «ھمید شہ‌بکش (کمبرزھی)»، «کامران شہ‌بکش (کمبرزھی)»، «ھبیب شہ‌بکش (کمبرزھی)»، سجّهیں شوکت ئے چُک، «سئید شہ‌بکش (کمبرزھی)»، «اکبر شہ‌بکش (کمبرزھی)» ءُ «ناسر شہ‌بکش»، سجّهیں موسا ئے چُک، «مهمد شہ‌بکش (کمبرزھی)»، نبی ئے چُک ءُ یک دگہ بلوچی کہ ناسر کمبرزھی ئے چُک گوشگ بوتگ، بلے داں انگتا آییئے پجّار اَلّم نہ اِنت.

اے ھالئے رَد ءَ، بانگواہ ءِ ساھت چار ئے وھدا نزامی ءُ امنیتی ٹولییا اے بلوچانی لوگئے سرا اُرش کرتگ ءُ آیان ءَ لوگئے جنیں آدمان ءُ چُکّانی دیما لٹ ءُ شاپ کرتگ ءُ بید چہ سرکار ئے ھُکم ءَ گوں وت برتگ۔ دزگیر بوتگیں سجّهیں مردم چہ دمگئے کار ءُ باری مردماں زانگ بنت ءُ ماں چاہ اھمد ئے سئے راھیا پہ لِهم کاری ءُ گاڑیانی اڈ کنگئے کاراں دلگوش اَنت.

ھال سرکنوکان ءَ گوَشتگ گوں اشیا کہ آیانی دزگیر بوھگ ءَ دوازدہ ساھت ءَ گیش گوَستگ بلے داں انگتا آیانی لوگئے مردمان ءَ ھچ ھالے سرپد ئے دست نہ کپتگ ءُ آیانی گوں زمّهواریں ادارھان ءَ رَندگیری تاں اے وھدا بے نتیجگ بوتگ.

اے اُرش ھماں وھدا کنگ بوتگ کہ نئمت‌اللہ شہ‌بکش (کمبرزھی)، سئید، اکبر ءُ ناسر ئے برات ماں تاریک 25 اسپند ماہ 1404 ءَ نزامی ءُ امنیتی ٹولییے ھمیں دمگئے سرا اُرشئے وھدا تیرگواری ءَ کُشگ بوتگ ءُ آییئے بے ساھیں جون چل روچا رَند لوگئے مردمان ءَ دیئگ بوتگ۔ آ وھدا سرکاری میڈیا ءَ آییئے سرا امنیتی بهتان بستگ اَنت، بلے سیاد ءُ لوگئے مردمان ءَ اے داواھاں رَد کرتگ اَنت ءُ گوشتگش آییا ھچ وڑیں ھمکاری گوں سلاہ بندیں گلان ءَ نہ بوتگ.

گوَشگ لوٹیت کہ سئے ھپتگ پیسرا 17 تیر ماہ ءَ رَسانک ءِ ھال سرکنوکان ءَ گوَشتگ کرار اِنت ماں دُزاپ ءُ تپتان ءَ امنیتی کاروایی ببیت کہ اے کارواییا بید چہ دمگ ءَ داشتگیں نزامی کارندگاں، لهتیں کارندگ چہ زابل ءَ آرگ بنت تانکہ اے کارواییا بهر بزور اَنت.