میرجاوہ ءَ سلاہ بندین ءُ پجّار نہ بوتگیں مردمانی دست ءَ مولوی «مهمدانور ریگی» کُشگ بوتگ/ اے دینی زانتکار ئے ترور کنگئے سئوب پہ ناتُپاکی ءَ گامگیجی اِنت یانکہ امنیتی پروندھانی جوڑ کنگ اِنت؟

رَسانک نیوز/ دوشمبے 29 تیر ماہ 1405 ءِ سباھئے ساھت چار ءَ، بلوچیں دینی زانتکار مولوی «مهمدانور ریگی»، کہ ماں سیستان ءُ بلوچستان ءَ چہ سرکار ئے نمایندگئے نیمگ ءَ میرجاوہ ئے جمے پیش نماز ئے اُوگدہ دیئگ بوتگ، شهر ئے جاما مسیت ئے نزّیک ءَ پژو گاڑییے سلاہ بندیں نندوکانی تیرگواریئے دپ ءَ کپتگ ءُ ساھی داتگ۔ اے ترور ھماں وھدا پیش آتکگ کہ کِساس ھژدہ ماہ پیسرتر چہ سرکاری نمایندگئے نیمگ ءَ آیی ءَ میرجاوہ ئے جمے پیش نماز ئے جاھا دیئگ، گوں بازیں جنجال، مهلوکئے زھرشانی، دمگئے مردم ءُ جُهدکارانی ھِلاپ امنیتی پرمندھانی جوڑ کنگ ءُ میرجاوہ ئے جاورانی ھراب بوھگ ءَ ھوار بوتگ۔ چہ بُن گپّ ءَ اے جُست پیداک بئیگ اِنت کہ چُش بیت کنت اے ویل پہ امنیتی زور ئے دیئگ، جهمنندان ءُ تچکیں دینی زانتکارانی ھلاپ پرمندھئے بندگ ءُ دمگ ءَ ناتُپاکیئے گیش کنگ ءَ نیمونی ببیت.

مولوی مهمدانور ریگی ماں تاریک 17 آبان ماہ 1403 ءَ پد چہ مهلوکئے گچین کرتگیں جمے پیش نماز «ابدلکهّار میربلوچزھی» ئے چہ جاھا کِرّ کنگ ءُ مستپا مهامی ئے پُشت واجهی ءُ تچکیں کار دارگا پہ میرجاوہ ئے جمے پیش نمازیئے اُوگدہ ءَ سربوتگ۔ آییئے پہ جمے پیش نماز ئے اُوگدہ ءَ سربوھگ گوں مهلوکئے بازیں زھرشانی ءَ ھوار بوتگ۔ دمگئے نندوکیں مهلوک ءَ تانکہ چُنت ھپتگ ءَ جمے نماز ھرتال کرتگ ءُ پہ نماز ئے وانگ ءَ مولوی ابدلکهّار ئے مسیت، لاویز ءَ شُتگ اَنت.

گوَشگ لوٹیت کہ مولوی مهمدانور ریگی پیش ءَ ماں تاریک 28 آزر ماہ 1403 ءَ ھماں وھدا کہ چہ مسیت ءَ ڈنّ بوتگ سلاہ بندین ءُ پجّار نہ بوتگیں مردمانی تیرگواریئے دپ ءَ کپتگ ءُ بلہ نُکسی نہ بوتگ.

تاک ریچان 1403 ءِ ویلان ءَ پد، اِنساپ ءُ امنیتی ادارھان ءَ گوں لهتیں جهمنندان ءُ دمگئے جُهدکارین ءُ با بهروسهیں مردمانی ھلاپ پرمندھئے جوڑ کنگ ءَ لوٹتگ مهلوکئے ھلاپ بوھگ ءُ زھرشانی ءَ امنیتی رنگ بدیئنت ءُ مولوی انور ئے اُوگدہ دیئگئے ھلاپیں مردمان ءَ زور بکننت۔ اے کارواییاں رَند چہ اشیا کہ مُستپا مهامی مهلوکئے گچین کرتگیں پیش نماز ءَ چہ جاھا کِرّ ءُ جنجالی گیش کرتگ، بُنگیج بوتگ اَنت.

داں انگتا پژو گاڑیئے سلاہ بندیں نندوکانی پجّار ءُ آیانی سئوب چہ اے کار ءَ زانگ نہ بوتگ۔ گوَست اگن چارَگ ببیت، اے گمان رؤت کہ سرکار لوٹیت اے ویل ءَ پہ دمگئے نندوکیں مردمانی میان ءَ ناتُپاکیئے گیش کنگ ءُ ھمیں وڑا امنیتی جاورانی تُرند کنگ ءَ کارمرز بکنت.