دُزاپ ءَ بلوچی کہ امنیتی ٹولییا دزگیر کرتگ، 23 روچ اِنت کہ سرگردان اِنت؛ لوگئے مردم پہ آییئے ھالے سرپد ئے دل پریشان اَنت

رَسانک نیوز/ مروچی پنچشمبے 18 تیر ماہ 1405، بلوچی کہ چہ دُزاپ ءِ بلوار ساراللّہ ءَ سپاہ ءِ چیریں ادارھئے سادہ پوشیں ٹولی ءَ بید چہ سرکار ئے ھُکم ءُ کئسور ءُ مئیار ئے گوَشگ ءَ پہ ھژم ءُ تُرندی ءَ دزگیر کرتگ ءُ اے ادارھئے دارگجاہ ءَ بُرتگ، آییا دزگیر بوھگئے 23 روچ ءَ رَند داں انگتا پہ وتی پرمندہ ءَ دسرسی نیست اِنت ءُ لوگئے مردم پہ آییئے ھالے سرپد ئے زانگ ءَ دل پریشان اَنت.

رَسانک ءَ اے بلوچئے پجّار «اتااللّہ نهتانی»، اُرپ «شهاب»، مجید ئے چُک، دُزاپ ءِ نندوک زانتگ.

رَسانک ءِ ھال سرکنوکانی رِد ءَ، اے دوران ءَ کہ آیی چیریں ادارھئے دارگجاہ ءَ بندیگ بوتگ، سکّ ءَ آزار اِش داتگ ءُ لٹ ءُ شاپِش کرتگ۔ پہ گروگان گِرَگئے پرمندھئے بُهتان ءَ زور سرا منّینگ ءُ اے پرمندہ آییئے سرا جَنَگ بوتگ.

گوَشگ لوٹیت 17 ھُرداد ماہ ءِ بانگواہ ءَ اتااللّہ ئے ناکو «جلیل نهتانی»، کِساس 45 سالگ، گوں وتی بَچَک «مهمداُمر نهتانی»، ءُ دو دگہ بلوچئے «یاسین مهمدزھی» ءُ «وھید شاھوزھی» ھوری ءَ ماں شستون ءَ چہ امنیتی ٹولییے ھِلگِرد ءُ تیرگواری ءَ ساھش داتگ۔ ماھی پد چہ اے ویلا بید چہ یاسین کہ آییئے بے ساھیں جون 16 تیر ماہ ءَ لوگئے مردمانی دست ءَ دئیگ بوتگ، آ دگہ مردمانی لاش امنیتی ٹولییا پہ وڑ وڑیں نیمون ءَ داشتگ ءُ داں انگت ءَ وارسانی دست ءَ نہ داتگ۔ امنیتی ادارہ ءَ پہ لاشانی دست ءَ دئیگ ءَ چہ لوگئے مردماں«تیر بهاء»، لوٹتگ.