چهبار ءَ چہ سلاہ بندیں مردمانی، لوگییے سرا اُرش ءَ دو بلوچیں جنیں آدم کُشگ ءُ یک جهمنندے آوار جنگ بوتگ

رَسانک نیوز/ جمے 1 ھُرداد ماہ 1405 ءِ شپ ءَ، کِساس ساھت 23:30 ءِ وھدا ماں چهبار ئے کُمب دمگئے اوسمان‌آباد ھند ءَ، 10 تاں 12 مردمانی ٹولییے پہ چُنڈی ڈگار ئے واھندییے جیڑہ ءَ اے ھند ئے سرا اُرش کرتگ ءُ چہ پُرّیگیں لوگییے سرا زوریں تیرگواری ءَ دو بلوچیں جنیں آدم کُشگ ءُ ٹپّیگ بوتگ، سلاہ بندیں مردمان ءَ یک جهمنندی آوار جتگ کہ ویلئے چار روچ ءَ پد داں انگت ءَ آییئے ھالئے سرپد ئے دست نہ کپتگ.

رَسانک ءَ کُشگ بوتگیں دویں جهمنند ئے پجّار داں انگت ءَ نہ گوَشتگ ءُ آوار جنَگ بوتگیں مردمئے پجّار «امام بکش ھوت»، چهبار ءَ اوسمان‌آباد دمگئے جهمنند زانتگ.

رَسانک ءِ ھال سرکنوکانی رِد ءَ، اُرش کنوکیں مردمان ءَ پہ اشیا کہ گوں امام بکش ءَ پہ ڈگارییے سرا جیڑھی بوتگ آییئے لوگئے سرا اُرش کرتگ ءُ پد چہ آییئے آوار جنَگ ءَ، واتر بوھگئے وھدا امام بکش ئے سیاد ءُ مردمانی گاڑیانی سرا پہ تُرس ءُ بیم ئے گیش کنگ ءَ تیرگواری کرتگ، اے تیرگواری ءَ دو بلوچیں جنیں آدم ءَ تیر وارتگ کہ یکی چہ آیاں جاہ ءَ ساہ داتگ ءُ دومی سکّ ءَ ٹپّیگ بوتگ ءُ ماں چهبار ئے امام اَلی نادراہجاہ ئے I.c.u واڈ ءَ بستری اِش کرتگ.

ھال سرکنوکان ءَ گوَشتگ: ٹپّیگ بوتگیں جنیں آدمئے ھالت نگیگ اِنت بلے پدا ھم آییئے ساہ ئے رَکّینگ ئے جُهد ءُ کوشست برجاہ اَنت۔ ویلئے چار روچ ءَ پد داں انگت ءَ امام بکش ئے بارئوا ھالے سرپدئے دست نہ کپتگ.

رَسانک ءِ ھال سرکنوکان ءَ اے ٹکّر ئے بُن گپّ ءَ جائیداد ئے سرا جیڑھی زانتگ ءُ گوَشتگش کہ اُرش کنوکان ءَ پہ امام بکش ئے سرا زور کنگ ءُ آییئے واھندی ئے رَندگیری ئے دیم دارگ ءَ، آوارش جتگ. ماں اے جاور ءَ، اے بلوچئے دارگ ئے برجاہ بئیگ ھماں وھدا بوتگ کہ سلاہ بندیں ٹکّر ءَ یک بلوچیں جنیں آدمی ءَ ساہ داتگ ءُ یکی دگہ ٹپّیگ بوتگ ءُ ھالتی سکّ نگیگ اِنت.