شستون ءَ گُشت ئے دمگ ءَ بلوچیں ھُردین چکّییے بے ساھیں جوں چُنت روچ پد چہ بیگواہ بئیگ، کُشگ ءُ لاشئے سوچگ ءَ دست کپتگ

رَسانک نیوز/ دوشمبے روچ 31 پروردین ماہ 1405، شستون ءِ گُشت دمگ ءَ بلوچیں ھُردیں چُکّی کہ جمے روچ 28 پروردین ماہ 1405، بیگاھئے ساھت ھپت ءِ کریب کہ بے نمبر پلیٹیں پژو پارس گاڑی ئے سلاہ بندیں نندوکان ءَ آوار جتگ، چار روچ پد چہ بیگواہ بئیگ ءَ آئی ءِ بے ساھیں جوں بُرّگ، چُنڈ چُنڈ کنگ ءَ رَند سوچگ ءُ ماں دمگئے کَش ءُ کرّیں گندانا دئور دئیگ بوتگ.

رَسانک ءَ اے بلوچیں چُکئے پجّار ءَ «پاتما ھسین‌بر»، 9 سالگ، یونس ئے چُک، بُندر ءَ شستون ءَ گُشت دمگ ءِ نندوکیں مردمی زانتگ.

رَسانک ءِ ھال سرکنوکانی رِد ءَ، اے چُک ءَ چہ ھماں دمگ ءَ کہ نندوک بوتگ آوارش جتگ ءُ ھاندان ءُ دمگ ئے نندوکیں مردمانی جُھد پہ آییئے شوھاز کنگ ءُ ھال سرپدئے دست کپگ ءَ بے سوب بوتگ ءُ ھچ وڑیں ھالی دست نہ کپتگ۔ آئی ءِ بے ساھیں جون ءَ دمگئے نندوکیں مردمان ءَ گوستگیں روچا شوھاز کرتگ۔ سوچک ءُ ٹپّانی باز بئیگ ءَ لاشئے پجّارگ سکّ کرتگ لوگئے مردمان ءَ آئی ءَ چہ پاد ئے دلا پجّاہ آورتگ ءُ تسدیک کرتگ.

رَسانکئے ھال سرکنوکان ءَ وتی گزارش ءَ گوشتگ: اے چُکّئے بے ساھیں جوں سوچَگ بوتگ کہ سوچکانی جُہلیں ٹپّ ءُ بُرّگ ءُ چُنڈ چُنڈ کنگئے پد ءُ نشان لاشئے سرا درا بوتگ اَنت. ھمیں وڑا اے چُکّئے دوئیں دستش بُرتّگ اَنت ءُ آئی ءِ بے ساھیں جوں یلا دئیگ ءِ وھدا ماں آس ءَ مان دارگ بوتگ.

گوشگ لوٹیت اے چُک ئے ھاندان ناچار ءُ تنگ دستیں مردم اَنت چکّئے پت گشت ءَ نگن ئے تندورا کارا اِنت۔ آئی ءِ نزّیکان ءَ گوشتگ: اے ھاندان ءَ گوں کس یانکہ کسانی ءَ ھچ پیمیں زاتی جیڑھی نہ بوتگ.