رَسانک نیوز/ شمبے 16 اسپند ماہ 1404 ءِ بانگواہ ءَ، دشتیاری ئے کلانی کور ءَ ایران ءُ آمریکا، اسرائیل ئے پئوجانی ٹکّر ءُ بے نندوکیں بالگرابانی آماچ ءَ بلوچے ٹیلکشّی کُشگ بوتگ.
اے بلوچے ٹیلکشّئے پجّار «تیّب بلوچ»، مھمدھسن ئے چُک، بُندر ءَ روچ دراَتکیں بلوچستان ءَ جیوونی شہر ئے نندوکیں مردمی زانگ بوتگ.
اے ھالئے رِد ءَ، بے نندوکین بالگرابے کہ ایرانی پئوج ئے گوں آمریکا، اسرائیل ئے پئوجاں ٹکّر ئے وھدا یکے چہ دوئیں نیمگاں یلاک دیگ بوتگ، اے ٹیلکشّئے کایک ءِ سرا کپتگ ءُ آئی ءَ ساہ داتگ.
تان انگت ءَ اَلّم نہ اِنت کہ اے بے نندوکیں بالگراب چہ کجام نیمگ ءَ یلاک دیگ بوتگ، ھمیں پیما زانگ نہ بیت کہ ایران یانکہ آمریکا ءُ اسرائیل ئے بوتگ۔ بلے جھمنندیں ھال سرکنوکان ءَ گوشتگ کہ ھمیں پئوجانی ٹکّر ئے وھدا اے ویل پیش اَتکگ.
اے بلوچیں ٹیلکشّئے بے ساھیں جون زی نیمروچ ءَ مان آئی ءِ پیداگ بوھگئے دمگ ءَ ھاکاں ائیر دیگ بوتگ.
Be the first to comment