جازموریان ءَ نزامی ٹولی ءَ پُرّیگیں لوگیئے سرا اُرش ءَ پد، پِت ءَ گوں بچِک ءَ دزگیر کرتگ

رَسانک نیوز/ دوشمبے 27 بہمن 1404 ءِ شپ ءَ، نزامی ٹولی ءَ جازموریان ءِ چاہ اَلیشاہ دمگئے سرا اُرش ءَ پد بید چہ سرکار ئے ھُکم ئے درا کنگ ءَ، پُرّیگیں لوگیئے تہا بوتگ اَنت ءُ بے چہ میئار ءُ کسور ئے گوشگ ءَ پتی ءُ آئی ءِ مردیں چُکّ ءَ دزگیر کرتگ ءُ چیئریں جاگہے بُرتگ.

رَسانک ءَ دزگیر بوتگیں بلوچانے پجّار «بہادر سابکی (ھوت)»، کِساس 75 سالگ ءُ آئی ءِ چُک «مهمد سابکی»، 37 سالگ، ھر دو ءَ جازموریان ئے چاہ اَلیشاہ دمگئے نندوک زانتگ.

رَسانک ءِ ھال سرکنوکانے رِد ءَ، نزامی ءُ امنیتی ادارہ آنے سادہ پوشیں ٹولی ءَ ماں شپ تھار ءَ ڈنّ چہ سرکار ئے ھُکم ءَ مهمد ئے لوگئے تہا بوتگ اَنت ءُ گوں پت ءَ دزگیر اِش کرتگ۔ امنیتی ٹولی ءَ بید چہ لوگئے مردمانے پسّو دیگ ءَ آیاں گوں وت برتگ.

ھال سرکنوکان ءَ گوشتگ: دزگیر کنگئے 24 ساھت ءَ پد، گوں ھاندان ءُ لوگئے مردمانی تر ءُ تاب ماں زھکلوت ءَ، داں انگت آیانی دارگ ئے جاگہ، دزگیر کنوکیں ادارہ ءُ جِند ئے جان دراہی ئے جاور زانگ نہ بوتگ۔ ھمیں پیم ءَ زمہ واراں ھم اے بابت ءَ جواب دئے نہ بوتگ اَنت.

گوَشگ لوٹیت: اے دوئیں بلوچ چہ پیشگ ءُ کار ئے لِھاز ءَ دکان دار ءُ کاشت کار اَنت. سیاد ءُ مردمان ءَ گوَشتگ: آیاں گوں ھچ کس ءُ گلی ءَ زاتی جیڑہ ءُ جنجالی نہ بوتگ۔ داں انگت ءَ آیانے سرا بستگیں الزام، ھمیں وڑا دزگیر کنوکیں ادارہ زانگ نہ بوتگ.