رَسانک نیوز/ مروچی یکشمبے 26 بہمن ماہ 1404، بلوچیئے بیگواہ بوھگئے ھال 23 روچ دیمترا شِنگ بوتگ، بلے داں انگت ءَ آئی ءِ سرنبشت ئے باراوا ھچ پیمیں ھالے دست نہ کپتگ ءُ ھاندان ئے رَندگیری بے سوب بوتگ، اے بلوچ ماں تاریک 3 بہمن ماہ پد چہ لوگ ءَ ڈنّ بوھگ ءَ، گمان داریں وڑی ءَ بیگواہ بوتگ، لوگئے مردمان ءَ ویل ئے چُنت روچ ءَ پد، اے بُن گپّ زمہ واریں ادارہ آن ءَ سر کرتگ. ھاندان ءَ نزامی ادارہ آن ءَ باز تر ءُ تاب کرتگ، بلے بید چہ چُنت مردمانے بِنداتی جُست ءُ پُرس کنگ ءَ، دگہ اَسَر داریں گامگیجی پہ جاور ئے روژناکی ءَ زورگ نہ بوتگ۔ رَندگیری آنی بے سوب بوھگ ءَ، لوگئے مردم آنے دل پریشانی گیش کرتگ.
رَسانک ءَ اے بلوچئے پجّار «اَلی دھواری»، 20 سالگ، ایسا ئے چُک، آروس کرتگ ءُ یک زھگئے پِت، بُندر ءَ شستون ئے آسپیچ دمگئے نندوکیں مردمی زانتگ.
رَسانک ءِ ھال سرکنوکان ءَ گوَشتگ: پد چہ ایشی ءَ کہ اَلی لوگ ءَ ڈنّ بوتگ ءُ وتی سنگتان ئے ھوری ءَ ناگان کَور ءَ شُتگ، چہ اُداں پہ گمان داریں وڑی بیگواہ بوتگ۔ آئی ءِ بے ھالے سرپد ئے بوھگ ءَ رَند، ھاندان ءَ ھاسکار آئی ءِ مات ءِ جِندا چُکّئے شوہاز کنگئے جُھد کرتگ ءُ گوں آئی ءِ سنگتاں ھال ءُ ھبری کرتگ۔ بلے ھچ نشانگے چہ اَلی ءَ دست نہ کپتگ.
اَلی ئے پِت دیمترا بیراں بوتگ ءُ دگہ چُشیں مردمی نیست اِنت کہ مدامی ءَ پہ آئی ءِ شوہاز ءَ گوں ھاندان ءَ ھمراھی بہ کنت۔ آئی ءِ مات ءَ وتی دل پریشانی درشان کرتگ ءُ چہ دمگ ئے مردمان ءَ پہ چُکّئے شوہاز ءَ کمک لوٹتگ۔ پرچی ءَ کہ سرگردانی ئے برجاہ بوھگ، زمہ وارانی روژنائیں پَسّو ئے نہ دیگ ءَ ھاندان ءِ زھنی جنجال گیش کرتگ.
رَسانک چہ جھمننداں ھاسکار شستون ءُ سوران ئے مهلوک ءَ دسبندی کنت پہ اے بلوچئے شوہاز ءَ کمک بکننت ءُ ھر کس ءَ اے باراوا ھالے دست کپت گوں اے میڈیا ءَ بہ جُڑ اِیت.
Be the first to comment