رَسانک نیوز/ چارشمبے 22 بہمن ماہ 1404 ءِ بانگواہ ءَ، واش ءِ مهمودآباد دمگ ءَ نزامی ٹولی ئے پُرّیں لوگی یے سرا اُرش ءَ چار بلوچ کُشگ ءُ ورنایئے ھوری ءَ دو بلوچ دزگیر بوتگ۔ سر بوتگیں ھالانی رِد ءَ، اے ٹکّر ءَ سئے نزامی کارمند ٹپیگ بوتگ.
یکی چہ کُشگ بوتگیں بلوچانے پجّار «ھالد براھویی»، ھُدارھم ئے چُک، واش ءِ مهمودآباد دمگئے نندوکیں مردمی زانگ بوتگ۔ دزگیر بوتگیں دوئیں بلوچانے پجّار «ھُدارھم براھویی»، ھالد ئے پِت ءُ آئی ءِ نوک ورنائیں برات کہ داں انگت ءَ پجّار نہ بوتگ.
اے ھالئے رِد ءَ، اُرش ھُدارھم ئے لوگئے سرا بوتگ ءُ اے اُرش ءَ ھالد ءُ آئی ءِ سئے ھمراہ کہ ھُدارھم ئے لوگ ءَ مہمان بوتگ اَنت، چہ نزامی ءُ امنیتی ٹولی ئے تیرگواری ءَ کُشگ، ھُدارھم ءُ آئی ءِ نوک ورنائیں چُکّے دزگیر بوتگ اَنت.
بے سِتکیں ھالانی رِد ءَ، لوگئے سرا اُرش ءِ وھدا مہمان آن ءُ امنیتی ٹولی ئے میان ءَ سلاہ بندیں ٹکّر ءَ لہتیں چہ نزامی کارمند آں ھم ٹپیگ بوتگ اَنت۔ بلے آیانی کَچّ ءُ جاور ئے باراوا سرکاری رنگ ءَ ھالی شِنگ نہ بوتگ.
ھمیں وھدا سرکاری میڈیا ءَ، چہ سپاہ ءِ کُدس ئے بُنجاہ ءَ سر بوتگیں ھال شِنگ کرتگ ءُ گوشتگ: واش ءُ دُزاپ ءِ شہر آں «چار تروریست کُشگ ءُ چُنت دگہ دزگیر کنگ بوتگ». سرکاری میڈیا ءَ داوا کرتگ کُشگ ءُ دزگیر بوتگیں مردماں مُلک ئے روچ در اَتکیں دمگ آن ءَ ماں سلاہ بندیں کاروایی آن ءَ بہر زورتگ.
Be the first to comment