مشھد ءَ زھرشانی ئے پادلپاش کنگ ئے وھدا، نزامی ٹولی ئے تیرگواری ءَ بلوچے کُشگ بوتگ

رَسانک نیوز/ شمبے 11 بہمن ماہ 1404، تاریک 24 دی ماہ مشھد ءَ ھاجہ ربی ئے مزار ئے نزّیک ءَ، بلوچی مهلوکئے زھرشانی ئے پادلپاش کنگئے وھدا، لگت پاد کنوکیں ٹولی ئے تیرگواری ءَ چرّہ ای لگّتگ ءُ سکّ ءَ ٹپیگ بوتگ، ٹپّانے باز بوھگ ءَ آئی ءَ ماں 2 بہمن ماہ ءَ ساہ داتگ.

اے بلوچئے پجّار «ابراھیم کلجایی»، کِساس 24 سالگ، گلام سرور ئے چُک، میرجاوہ ئے نندوکیں مردمی زانگ بوتگ.

ھال وشّ ئے ھالانی رِد ءَ، پادلپاش کنوکیں ٹولی ءِ تیرگواری ءَ کِساس 48 چَرّہ ای تیر، ماں جون ئے چُش کہ سر، دیم، گردن، سینگ ءُ لاپ ءِ بہر آں وارتگ، بلے سر ءَ لگّتگ ایں تیر آں آئی ءِ ھالت نہ گیگ کرتگ.

ھاندان ئے نزّیکیں مردمان ءَ گوشتگ چہ امنیتی پیش آتک ءُ دزگیر بوھگئے بیمّ ءَ لوگئے مردمان ءَ آئی، نادراہجاہ ءَ نہ بُرتگ ءُ لوگ ءَ دُراہ کنگئے جُھد کرتگ۔ ھالت ئے نہ گیگ بوھگ ءِ ھپت روچ ءَ پد، چہ ناچاری ءَ مشھد ئے امام رزا نادراہجاہ ءَ سر کنگ بوتگ۔ بستری بیئگ ئے چُنت ساھت ءَ پد، آئی ءَ نادراہجاہ ءَ ساہ داتگ.

گوشنت: ابراھیم کلجایی ئے بے ساھیں جون ماں تاریک 5 بہمن ماہ ءَ لوگئے مردمانی دست ءَ دیگ بوتگ۔ آئی ءِ بے ساھیں جون یک روچ ءَ رَند ماں 6 بہمن ماہ ءَ پیداگ بوھگئے دمگ میرجاوہ ءَ ھاک آں ایئر دیگ بوتگ.