رَسانک نیوز/ سئے شمبے روچ 30 دی ماہ 1404 ءَ، یزد ئے میبُد ءَ مهلوک ءِ زھرشانی ئے وھدا چیئریں ادارہ ئے سادہ پوشیں ٹولی ءَ چہ ھژدہ سال ءَ کم دو نوک ورنا ئے ھوری ءَ، سئے بلوچ دزگیر کرتگ کہ دزگیر بوھگ ءِ دہ روچ ءَ پد، داں انگت ءَ بندیگ اَنت.
رَسانک ءَ اے سئے بلوچئے پجّار «میئسم دمندان (ارباب) »، 17 سالگ، نیاز مهمد ئے چُک، «ھامد ارباب زھی»، 19 سالگ، مهی الدین ئے چُک، ھر دو زھک ئے نندوکیں مردم «پرھان پسج (ارباب )»، کِساس 15 سالگ، ابدلستار ئے چُک، دُزاپ ئے بازار مشترک ءِ نندوک زانتگ.
رَسانک ءِ ھال سرکنوکانے رِد ءَ، اے بلوچ پہ کارگری ءَ میبُد ءَ شُتگ اَنت ءُ اُدے کاشی ءُ کارتن جوڑ کنگئے کار ھانگ آں کار ءَ دلگوش بوتگ اَنت کہ مهلوکئے زھرشانی ئے وھدا ماں یزد ئے میبُد شہر ءَ چیئتیں ادارہ ئے سادہ پوشیں ٹولی ءَ دزگیر کرتگ اَنت۔ اے میان ءَ دو بلوچ میئسم ءُ پرھان، کہ دیمترا یکی چہ اے دو ءَ گُٹّگ ئے آپریشن کرتگ ءُ آئی ءَ درمان ئے زلورت اِنت، ماں یزد ئے بندیگجاہ ءَ شَر کنگ ءُ ادب دیگ ءِ واڈ ءَ دارگ بوتگ اَنت.
ھال سرکنوکان ءَ گوشتگ: ھاندان ءُ لوگئے مردمانے رَندگیری ءَ پد، اِنساپ ادارہ ئے زمہ واران ءَ گوشتگ آیاں پہ بانک ئے سوچگ ءُ مهلوک ءَ سرکار ئے ھِلاپ شور دیگ ئے الزام ءَ دزگیر بوتگ اَنت، بلے تاں ھم اے بابت ءَ امنیتی ادارہ آن ءَ ھچ سبوت ءُ مُهکمیں سندے نیست اِنت.
Be the first to comment