رَسانک نیوز / مروچی جمه 10 بہمن ماہ 1404 ءَ، کرمان ءِ شہر ءَ جمے روچ 19 دی ماہ ءِ بیگاہ ءَ مهلوکئے زھرشانی ئے پادلپاش کنگئے وھدا نزامی ٹولی ءِ تیرگواری ءَ، شہدربریں بلوچیں جنیں چُکّی ءَ ماں سرین ءَ تیر وارتگ ءُ ساہ داتگ.
رَسانک ءَ بلوچیں جنیں چُکّئے پجّار «مرزیہ کمالی ( بامری )»، 23 سالگ، ھسین ئے چُک، بُندر ءَ امبرآباد ئے نندوکیں مردمے زانتگ کہ کرمان ئے شہدربر جاہ ءَ ڈاکٹری انجینئرینگ ءِ وانوکے بوتگ.
رَسانک ءِ ھال سرکنوکانی رِد ءَ، مرزیہ جمے روچ 19 دی ماہ 1404 ءَ کرمان ءِ بھمنیار روڈ ءَ مهلوکئے زھرشانی ئے پادلپاش کنگ ءِ وھدا چہ لگت پاد کنوکیں ٹولی ئے تیرگواری ءَ ماں سرین ءَ تیر وارتگ ءُ ساہ داتگ.
ھال سرکنوکان ءَ گوشتگ: مرزیہ ئے بے ساھیں جون ماں شمبے روچ 20 دی ماہ ءَ پد چہ ھاندان ئے بیہار دیگ ءُ کولنامہ ئے دسھت کنگ ءَ لوگئے مردمانے دست ءَ دیگ بوتگ ءُ ھماں روچئے بیگاہ ساھت 19:30 ئے کریب آئی ءِ پیداگ بوھگئے دمگ ءَ ھاک آں ایئر دیگ بوتگ. مرزیہ ئے مانش ءَ ایئردیگ ءِ مراگش گوں امنیتی ءُ تُرندیں جاوران ءَ ھوار بوتگ ءُ ھمیں سوب ءَ بازیں سیاد ءُ مردمی ءَ نہ توانتگ مراگش ءَ بہر بہ زور اَنت.
Be the first to comment