رَسانک نیوز/ 7 بہمن ماہ 1404 ءَ، سوبہ کرمان ئے بابک شہر ءَ نزامی ٹولی ءَ بید چہ پیسریگیں اُوشت ءُ دلگوش دیگ ءَ سواری گاڑی یے سرا کہ آئی ءَ سئے بلوچ نندوک بوتگ ءُ چہ سیستان ءُ بلوچستان ءَ دیم پہ یزد ءَ روگ ءَ بوتگ اَنت تَچکیں تیرگواری کرتگ۔ نزامیانی اے کاروایی گوں یک بلوچی یے کُشگ ءُ دو دگرے ٹپیگ ءُ دزگیر کنگ ءَ ھوار بوتگ.
کُشگ بوتگیں بلوچئے پجّار «مبین شهنوازی»، 25 سالگ، سمال ئے چُک، واش ئے نندوکیں مردم ءُ دو دگہ ٹپیگ ءُ دزگیر کنگ بوتگیں بلوچانے پجّار «الیاس شهنوازی»، 27 سالگ، گل مهمد ئے چُک ءُ «آرپ شهنوازی»، مهمد ئے چُک، ھر دو بُندر ءَ واش ئے نندوک زانگ بوتگ اَنت.
اے ھالئے رِد ءَ، تیرگواری ءَ بانگواہ ئے ساھت پنچ ءَ امنیتی باسک ئے سادہ پوشیں ٹولی ءَ بید چہ پیسریگیں اُوشت ءُ دلگوش دیگ ءَ کرتگ۔ اے تیرگواری ءَ مبین شهنوازی ءَ تیر وارتگ ءُ جاہ ءَ ساہ داتگ۔ الیاس ءُ آرپ شهنوازی ءَ تیر ورگ ءُ ٹپیگ بوھگ ءَ پد، دزگیر کنگ بوتگ اَنت.
مبین ئے لوگئے مردمانی رَندگیری ءَ بیست ءُ چار ساھت ءَ بُرز شُتگ، بلے داں انگت لاش آیانے دست ءَ دیگ نہ بوتگ۔ ھمیں وڑا ٹپیگ ءُ دزگیر بوتگیں دو بلوچئے اِنساپ ءِ جاور زانگ نہ بوتگ.
داں انگت ءَ اے ویلئے درگت ءَ گیشیں ھالے دست نہ کپتگ ءُ نہ سرکاری ءُ روژنیں جارے اے بابت ءَ دیگ بوتگ.
اولین نفری باشید که دیدگاه مینویسد