رَسانک نیوز/ پنچشمبے روچ ءَ 25 دی ماہ 1404 ءَ، جالک ءِ سیمسر ئے راہ ءَ سیاھان کوہ ءِ نزّیک ءَ سیمسراں چاروگیں نزامی ٹولی ئے تَچکیں تیرگواری ءَ بلوچی ماں سر ءَ تیر وارتگ ءُ ساہ داتگ.
کُشگ بوتگیں بلوچئے پجّار «یاسین سیاھانی»، 20 سالگ، ھُدا بکش ئے چُک، شستون ئے مہرگان زِلّھ ئے امان آباد دمگئے نندوکیں مردمی زانگ بوتگ.
اے ھالئے رِد ءَ، ھماں وھدا کہ یاسین وتی پٹ پٹی ءَ سوار بچہ راھی ءُ اسپندک ءِ میان ءَ سیاھان کوہ ئے سیمسرانی راہ ءَ روگ ءَ بوتگ کہ سیمسر ئے چاروگیں نزامی ٹولی ءَ بید چہ پیسریگیں دلگوش ءِ دیگ ءَ آئی ءِ سرا تیرگواری کرتگ، یاسین ءَ ماں سر ءَ تیر وارتگ ءُ ساہ داتگ.
نزامی ٹولی ئے تیرگواری ءَ پد، اے بلوچئے بے ساھیں جون سیمسر ئے پاسگاہ ءَ سرکنگ بوتگ۔ نزامی ٹولی ءَ اوّل سر آئی ءِ لوگئے مردم گوشتگ اَنت اے بے ساھیں جون گَشت ئے وھدا اَچانک ءَ آیانی دیم ءَ کپتگ۔ پد چہ ھاندان ئے رَندگیری ءُ تیر آنے نشان ءِ گِندگ ءَ نزامی ٹولی ءَ اے گپّ منّتگ کہ یاسین چہ آیانی تیرگواری ءَ کُشگ بوتگ.
گوشگ لوٹیت کہ چہ ایشی ءَ دیمتر 21 دی ماہ 1404 ءَ ھمیں جاگہ ءَ اے ورنائے سیادے کہ آئی ءِ نام نادر سیاھانی، 16 سالگ درا بوتگ چہ نزامیانے تیرگواری ءَ کُشگ بوتگ.
اولین نفری باشید که دیدگاه مینویسد