رَسانک نیوز/ دوشمبے 8 دی ماہ 1404 ءَ، دُزاپ ءِ شہرک کارگاھی ءَ دوازدہ روچ دیمترا آوار جَنَگ بوتگیں بلوچی ئے داں انگت ءَ ھچ ھالے سرپدئے نیست اِنت ءُ نہ کہ آئی ءِ دارگ ءِ جاگہ زانگ بوتگ۔ نزامی ءُ امنیتی ادارہ آں، ھاسکار دُزاپ ءِ جُست ءُ پُرسی ادارہ ءَ ھچ سوب مندیں کاروایی پہ آئی ءِ سر نبشت ءِ روژناک بوھگ ءَ نہ کرتگ.
رَسانک ءَ اے بلوچئے پجّار «پریدون امیرمنش (میر)»، آروس کرتگ ءُ زھگ آنے پت، دُزاپ ءِ نندوک زانتگ.
رَسانک ءِ ھال سرکنوکانے رِد ءَ، اے بلوچ چارشمبے 26 آزر ماہ ءِ شپ ءَ، ھماں وھدا کہ وتی پنچ سنگت ءَ ھور لوگی ءَ نندوک بوتگ، سلاہ بندین ءُ بے پجّاریں مردمان ءَ آئی ءِ سرا اُرش کرتگ۔ اُرش جنوکان ءَ دمگئے رسم ءُ رواج ءَ ڈنّ، گُد گُورا بوتگ ءُ گوں سئے پژو گاڑی ءَ دمگ ءَ تہا بوتگ اَنت ءُ پارسی زبان ءَ ھبر اِش کرتگ۔ آیاں پہ سئی تیری ئے زور ءُ بیہار ءَ اے بلوچ آوار جتگ ءُ بُرتگ.
ھال سرکنوکان ءَ گوشتگ: آئی تریلی ئے ڈریورے اِنت ءُ نہ کہ مال ءُ مڈّی یے است ءُ نہ کسی یے وامدار اِنت۔ آئی ءَ گوں ھچ کس ءُ گلی ءَ جنجال ءُ جیڑہ اے نہ بوتگ۔ آئی ءِ ھاندان ءُ لوگئے مردم پہ آوار جنگ ئے ویل ءِ رندگیری ءَ دُزاپ ءِ جُست پُرس کنوکیں ادارہ ءُ اِنساپ ءِ ادارہ ءَ باز تر ءُ تاب کرتگ، بلے آیاں رُژنیں پسّویی دست نہ کپتگ.
پریدون ئے سیاد آن ئے گوشتگیں گپّ آنے رِد ءَ، جُست ءُ پرس کنوکیں ادارہ ئے زمہ واران ءَ آئی ءِ ھاندان ءُ لوگئے مردمان ءَ گوشتگ: ھچ کارے چہ آیانی دست ءَ بیت نہ کنت ءُ داو اِش کرتگ: «باید اِنت وام دیگ بہ بنت تاں کہ اے جھمنند آجو بہ بیت». پریدون ئے ھاندان ءَ اے داوا رَد کرتگ ءُ اے گپّ ءِ سرا زور داتگ کہ آئی ءَ نہ پروندہ ءُ گوَستی است ءُ نہ کسی یے وامدار اِنت۔ ویل ءَ دو ھپتگ گوَستگ، بلے داں انگت ءَ آئی ءِ نہ ھالے سرپدئے دست کپتگ ءُ نہ آئی ءِ دارگ ءِ جاگہ زانگ بوتگ.
اے بلوچئے بے ھالے سرپدئے برجاہ بوھگ ءُ زمہ وارانے اے باراوا پَسّو ئے نہ دیگ ءُ گامگیجی نہ کنگ ءَ دُزاپ ءَ نندوکیں ھاندان ءُ جھمنندانے ایمنی ئے درگت ءَ زھنی جنجال گیش کرتگ ءُ زمہ وار آنے پدکِرد ءَ، آوار جَنَگ ءِ پروندہ آنے سرا جُست آنے دپ ءَ داتگ.
اولین نفری باشید که دیدگاه مینویسد