دلگان ءَ سلاہ بندین ءُ بے پجّاریں مردمان ءَ بلوچیئے لوگئے سرا اُرش ءَ پد، تیرگواری کرتگ ءُ آئی کُشتگ

رَسانک نیوز/ پنچشمبے روچ ءَ 20 آزر ماہ 1404 ءَ، دلگان ءَ چُنت سلاہ بندین ءُ بے پجّاریں مردمان ءَ بلوچیئے نندگئے لوگ ءِ سرا اُرش ءَ پد، تیرگواری کرتگ ءُ آئی کُشتگ۔ اے بلوچئے بے ساھیں جون کُشگ بوھگئے چُنت ساھت ءَ پد گزگر دمگ ءَ چہ آئی ءِ زاتی گاڑی ئے تہا جھمنندانے دست ءَ کپتگ.

رَسانک ءَ اے بلوچئے پجّار «اَلی بامری (میرکی)»، کِساس 56 سالگ، داھُدا ئے چُک، سئے جن ءُ یازدہ چُکّے بوتگ ءُ بُندر ءَ دلگان ئے مردمی زانتگ.

رَسانک ئے ھال سرکنوکان ءَ گؤشتگ: سلاہ بندیں مردماں چہ دیوال ءَ لوگ ءَ تہا بوتگ ءُ اُدے سامان رِھتگ ءُ تالان کرتگ ءُ گُمان اِنت کہ چہ اَلی ئے کُشگ بوھگ ءَ پیسر آیانے میان ءَ دست جنگی بوتگ۔ اَلی ءَ ایوک ءَ زندمان گوازینتگ ءُ اے اُرش ءَ آئی ءَ سئے تیر ماں سر، سینگ ءُ دست ءَ وارتگ.

ھال سرکنوکان ءَ گؤشتگ: سلاہ بندیں مردمان ءَ تیرگواری ءَ پد، اے بلوچئے بے ساھیں جون لهیپ ءِ تہا پیتکگ ءُ گوں آئی ءِ زاتی گاڑی ءَ چہ دلگان ءَ ڈنّ، گزگر دمگئے نزّیکا یلاک داتگ۔ چہ پٹّ ءُ پول آں درا بوتگ کہ جنوکان ءَ گُڑسرا آئی ءِ گُٹ ساد ءَ گوں بستگ ءُ ھپَگ کرتگ، ساد ئے پد ءُ نشاں گردن ءَ جاھ اَتکگ اَنت.

گؤشگ لوٹیت: چہ ھاندان ئے رندگیری ءَ پد ءُ بے ساھیں جون ئے دست کپگ ءُ گاڑی ءِ سرا ھونیں دست آنے پد ءُ نشانئے ایئر بوھگ کہ گمان رَؤت جنوکانی دست بوتگ اَنت۔ نزامی ءُ امنیتی ادارہ آن ءَ، رپوٹ ءَ پد ھم ھچ پیمیں گامگیجی نہ کرتگ ءُ نہ کہ جُست پُرس کنوکیں ادارہ ءَ وتے زمہ واری پورا کرتگ.

گوں اے گپّ ءِ دلگوش بیئگ ءَ کہ اَلی بامری بے آزاریں مردمی بوتگ ءُ دلگان ءُ پہرہ ئے راہ ءَ مساپر کشّی یے کرتگ. جنوکانی پجّار ءُ آیانی سوب ءُ مول چہ اے کارا داں انگت زانگ نہ بوتگ.