دُزاپ ءَ سپاہ ءِ ٹولی ئے سرا سلاہ بندیں مردمانے اُرش ءَ کُشگ بوتگیں کارمندانے کَچ چار ءَ سر بوتگ، راجی پدائیانی سنگر ءَ اے اُرش ءِ زمّہ واری منّتگ

رَسانک‌نیوز/ چارشمبے 19 آزر ماہ 1404 ءَ، دُزاپ ءِ لار دمگ ءَ سلاہ بندیں مردمانے سپاہ ءِ گاڑیانے سرا اُرش ءِ وھدا ٹپیگ بوتگیں کارمندی ءَ ساہ داتگ، اے پیم ءَ کُشگ بوتگیں، سپاہ ءِ کارمندانے کچ چار ءَ سربوتگ.

سرکاری میڈیا ءَ کُشگ بوتگیں کارمندانے پجّار «سجّاد مرئشی»، «مهمد بزی»، «اَلیرزا نسیرآبادی سرھدی»، «اَلیرزا پیری» سجهیں زابل ئے نندوکیں مردم گؤشتگ۔ ٹپیگ بوتگیں دو کارمند ئے پجّار داں انگت ءَ گؤشگ نہ بوتگ.

گؤشگ لوٹیت: نیمروچئے ساھت یک ءُ نیم ءَ سپاہ ءِ لار دمگ ءِ ٹولی ئے چار گاڑیانی سرا کہ وتی بُنجاہ ءَ روگ ءَ بوتگ اَنت، سلاہ بندیں مردمان ءَ اُرش ءُ تیرگواری کرتگ۔ سپاہ ءِ کمانڈری ھم اے گاڑیان ءَ نندوک بوتگ، سرکاری میڈیا کہ امنیتی ادارہ آنے ایئردست اِنت اوّل سرا سئے کارمند ئے کُشگ بوھگ ءَ منّتگ.

راجی پدائیانی سنگر نامیں نوکیں گل ءَ اے اُرش ءِ زمہ واری منّتگ۔ تنزیم ئے جارکشّ ءَ اے کاروایی مزلومیں بلوچانی بیڑ زانتگ.