رَسانک نیوز/ شمبے روچ 8 آزر ماہ 1404 ءَ، جازموریان ئے پنگ دمگ ءَ، پنگئے نزامی بُنجاہ ءِ ٹولی ءَ بلوچے ٹیلکشّئے ھالیگیں گاڑی داشتگ۔ آئی ءَ چہ تُرس ءُ لوٹتگیں زرّ آنے وس ءَ ڈنّ بوھگ ءَ چہ چیک پوسٹ ءَ در شُتگ، نزامی ٹولی آئی ءِ پدا کپتگ ءُ ماں ٹپیگیں ھالت ءَ گوں وتی گاڑی ءَ لپاشتگ.
رَسانک ءَ اے بلوچئے پجّار «مهمد نارویی»، یونس ئے چُک، بُندر ءَ پہرہ ئے نندوکیں مردمی زانتگ.
رَسانک ءِ ھال سرکنوکانے رِد ءَ، نزامی ٹولی ءَ پد چہ مهمد ءِ دزگیر کنگ ءَ آئی ءِ ھالیگ بار گاڑی داشتگ ءُ جند ءَ ماں نزامی بُنجاہ ءَ سکّ آزار داتگ۔ نزامی ٹولی ءَ پہ جند ئے آجو کنگ ءُ گاڑی ئے یلاک دیگ ءَ بیست ملیون جول لوٹتگ کہ مھمد ءَ اے گپّ نہ منّتگ، ھماں وھدا کہ مھمد تھنا بوتگ چہ بُنجاہ ءَ در شُتگ۔ نزامی آں آئی ءِ پدا کپتگ اَنت ءُ پہ زانتکار ءَ گوں وتی گاڑی ءَ لپاشتگ.
ھماں کہ چمّ وت اے ویل دیستگ گوشتگش: نزامی ٹولی ءَ آئی سکّ لٹ ءُ شاپ کرتگ تاں اداں کہ آئی ءِ سرین ءُ مگوں ٹپیگ ءُ ھالتی نہ گیگ بوتگ۔ نزامی ٹولیئے اے در کانونے کاروایی ءَ پد، انسانیت ئے لھاز نہ کرتگ ءُ ٹپیگیں ٹیلکشّ ءَ جاہ ءَ یلاک داتگ ءُ وتے بُنجاہ ءَ پَچ ترّتگ اَنت.
ھال سرکنوکان ءَ گوشتگ: نزامی ٹولی پد چہ ایشی ءَ کہ مھمد گوں گاڑی ءَ لپاشتگ ءُ ٹپیگ کرتگ، پہ وتی رکّینگ ءَ کسّہ ءَ دگہ رنگی داتگ ءُ مھمد ئے سرا سلاہ بند بوھگئے دروگیں پروندہ بستگ.
اے بلوچے ٹیلکشّئے سیاد ءُ مردمان ءَ گوشتگ: مھمد ئے ھاندان ءِ مردماں چُش کہ بانوک «سکینہ نارویی»، یکے چہ ھمت گل ئے زمہ واران ءَ گوشتگ: اگاں اے گپّ پہ پِت بہ بیت، ویلئے زمہ وار زھکلوت ئے نزامی ٹولی بوتگ گُڑا ما ھم زھرشانے ءُ مچّی ئے گپّ ماں تہران ءَ گوں وتی گل ئے سیاسی دپترا ٹاھینتگ ءُ زھرشانے کنیں.
گوشگ لوٹیت: اے جار ءَ پد مهمد ئے پروندہ ئے چاروگ ءُ زمہ وار، کازی مولایی ءَ ماں تاریک 10 آزر ماہ ءَ پہ زمانت ئے سرا آئی ءِ آجو کنگ ءَ منّتگ ءُ ھُکمی داتگ.
گوں ٹیلکشّ آں اے وڑا در کانوں پیش آھگ ءُ آیانے سرا کُشوکیں ھژمئے کارمرز کنگ، ایوک ءَ جھمنند آنے ساہ ءَ بیہار نہ دنت بلکیں درا کنت کہ سرکار نزامی ٹولی ئے کردار ءِ سرا چمشانک نہ دنت ءُ کنٹرولی نیست اِنت. جاور آنے ھمیں پیم ءَ دیمروی دمگ ءَ بد امنی ءُ انسانے جان آنے نُکس ءُ تاوان آں گیش کنت.
Be the first to comment