بزمان ءَ دو سالگیں بلوچے چُکّیے بیگواھی چہ زمہ وار آنے دلگوش نہ بیئگ ءَ سد ءُ یازده روچ ءَ پد، انگت برجاہ اِنت

رَسانک نیوز / مروچی شمبه 8 آزر ماہ 1404 ءَ، بزمان ئے گریب آباد دمگ ءَ، دو سالگیں بلوچے چُکّی کہ ماں تاریک یک شمبے ئے روچ 19 مرداد ماہ ءَ گمان داریں وڑے ءَ بیگواہ کنگ بوتگ، سد ءُ یازده روچ ءَ پد داں انگت آئی ءِ ھالے سرپدئے نیست اِنت، لوگ ءُ دمگئے مردمانی جُھد پہ آئی ءِ شوھاز کنگ ءَ سوبمند نبوتگ. اے در ءُ دوراں دمگئے امنیتی زمہ واران ءَ پہ آئی ءِ شوھاز کنگ ءَ ھچ پیمیں گامگیجی نہ کرتگ.

اے بلوچے چُکّئے پجّار «زُلپا شهلی‌بر»، کساس 2 سالگ، اھسان ئے چُک، بزمان ئے نندوک زانگ بوتگ.

رَسانک ءِ ھال سرکنوکان ءَ گوشتگ: زلپا یک شمبے روچ ءَ چہ لوگا ڈنّ شُتگ ءُ داں انگت ءَ بے ھالے سرپدئے اِنت. اے چُکّئے لوگ ئے مردمان ءَ گوشتگ آئی ءِ بیگواہ بوھگ ءَ گوں پہ اشتاپ ءَ شوھاز ئے جُھد اِش کرتگ بلے داں انگت ءَ سوبین نہ بوتگ. دمگ ءَ بازیں تر ءُ تاب ءَ پد، آئی ءِ ھالے سرپدی دست نہ کپتگ.

اے ویل ءَ دمگ ءَ نندوکیں مردم سکّ ءَ دل پریشان کرتگ ءُ جھمنندان ءَ چہ انتزامی ءُ امنیتی ادارہ آن ءَ لوٹتگ پہ اے چُکئے شوھاز کنگ ءُ ھاندان ئے دست ءَ دیگ ءَ وتی زمہ واریاں شرّی یے سرا پورا بہ کن اَنت.