رَسانک نیوز/ 25 آبان ماہ 1404 ءَ، دُزاپ ءِ مزاری روڈ ءَ آسودہ درمانجاہ ءِ دیما 7 ءُ 9 نمبر ڈکّانی میان ءَ سادہ پوشیں امنیتی ٹولی ءُ سئے بلوچئے میان ءَ سلاہ بندیں ٹکّر ءَ، سئیں بلوچ کُشگ بوتگ اَنت۔ ٹکّر ءِ بُنگیج بوھگ ءَ گوں دو بلوچ ءَ تیر وارتگ ءُ کُشگ بوتگ ءُ آیانے سئے اُمیں ھمراہ پانزدہ دکیکت پد جنگ بوتگ.
کُشگ بوتگیں بلوچ آنی پجّار «مھمود براھویی»، «اسمائیل ھارکویی» ءُ «اُمید سپرزایی (نورزھی)»، بُندر ءَ دُزاپ ئے مردم زانگ بوتگ اَنت.
امنیتی ٹولی ئے اے دمگ ءِ سرا اُرش ءِ بابت ءَ بازیں شکّ ءُ گمان ھست، اے بابت ءَ جھمنندان ءُ سرکاری رپوٹ ءِ میان ءَ بازیں پَرک ھست.
سیستان ءُ بلوچستان ءِ انتزامی کمانڈر ئے جانشین ءَ وتی سرکاری رپوٹ ءَ اے بلوچ آن ءَ، سرکار ئے ھلاپیں مردم، در مُلکی باشندگ، سلاہ بندیں دُزّ گوشتگ۔ آئی ءَ گوشتگ مزنیں کاروایی یے تہا اے مردم جنگ بوتگ اَنت ءُ سلاہ ءُ دُزّتگیں سامان چہ آیاں دست کپتگ.
رَسانک ءِ ھال سرکنوکان ءَ دوشی ٹکّر ئے وھدا گوشتگ: سادہ پوشیں امنیتی ٹولی ءَ لوگی یے سرا اُرش کرتگ ءُ جھمنندان ءَ ٹکّر ءِ جاہ ءَ پہ نزّیک بوھگ ءَ نہ ھِشتگ، ھمیں پیم امنیتی ٹولی ءَ کسّ ءَ اَکس ءُ ویڈیو ئے گِرگ ءَ نہ ھِشتگ.
گوشگ لوٹیت: اے ٹکّر ءَ کُشگ بوتگیں مردم سجهیں بلوچ ءُ دُزاپ ءِ نندوک بوتگ اَنت. آیان ءَ سرکارے دشمن ءُ در ملکی باشندگ ءِ زانگ ھکومتئے پروپکنڈہ اِنت کہ لوٹیت راستی ءَ چئیر بدنت ءُ کسّہ دگہ رنگی گوشگ بہ بیت.
Be the first to comment