واش ءَ ٹاھینتگیں بدامنی آنے گیش بوھگ ءِ ھوری ءَ، سلاہ بندیں دُزّانی اُرش ءَ بلوچے آوار جنگ بوتگ

رَسانک نیوز/ مروچی جمے 23 آبان ماہ 1404 ءِ بانگواہ ءَ، واش ءَ سلاہ بندیں دُزّان ءَ پراید گاڑیئے سرا اُرش کرتگ ءُ گاڑی ءَ نُکس ءُ تاواں داتگ۔ اے گاڑی ئے واھُند ریل گاڑی ئے پروژہ ئے نگہپان ءُ چاروگ بوتگ۔ ھمیں وھدا بلوچے کہ وتی پٹ پٹی ئے رکّینگئے جُھد کرتگ، دُزّان ءَ آوار جتگ.

جھمنند گؤشنت: سلاہ بندیں مردماں شہر آنے تہا ءُ ڈنّ چہ شہر آن ءَ گوں بے نمبر پلیٹیں گاڑیان ءَ بے تُرس ءُ لرز ءَ رو اَنت ءُ کاینت. امنیتی ٹولی نہ ویل ءِ وھدا، نہ کہ پد چہ ویل ئے ھالئے سرکنگ ءَ جاہ کاینت ءُ پهکا گار اَنت۔ پہ سلاہ بندیں دُزّانی دیم دارگ ءَ ھچ پیمیں گامگیجی زورگ نہ بوتگ.

بلوچی کہ پٹ پٹی ءَ سوار بوتگ ءُ سلاہ بندیں دُزّان ءَ آوار جتگ داں انگت ءَ آئی ءِ پجّار زانگ نہ بوتگ۔ بلے رَسانک ءِ ھال سرکنوکان ءَ گوشتگ: ھماں وھدا کہ دُزّان ءَ پراید گاڑی ءِ دُزّگ ئے جُھد کرتگ ءُ ڈریور ءَ آیانی دیم داشتگ، دُزّان ءَ پراید گاڑی ئے شیشگ پُروشتگ اَنت ءُ چُنت تیر گاڑی ئے سرا شانتگ۔ دُزّان ءَ پٹ پٹی دُزّتگ ءُ آئی ءِ واھُندش آوار جتگ کہ داں انگت ءَ آئی ءِ ھالے سرپدئے نیست اِنت.

اے ھالے رِد ءَ، واش ءِ نندوکیں مردمان ءَ چہ سلاہ بندیں مردمانی تر ءُ تاب، بے نمبر پلیٹیں گاڑیانی روگ ءُ آھگ ءَ دیمترا وتی دل پریشانے درا کرتگ۔ آیان ءَ گوشتگ: دُزّانی پروندہ مزنیں وھدا ماں امنیتی ادارہ آں ایئر بنت ءُ ھچ دلگوشی آیانے سرا دیگ نہ بیت، امنیتی ادارہ آں پہ سردی ءَ دُزّیانے پروندہ آں رندگیری کننت چہ دومی نیمگ ءَ سلاہ ءِ زورا دُزّی آنے ویل ءُ واک گیش بوھگ اَنت.