رَسانک نیوز/ زی 3 آبان ماہ 1404 ءَ، واش ءِ امام جمے دپتر ءَ (ھاشمزھی، کرد ءُ جمالزھی)، کبیلہ ئے ھاندان آنے میان ءَ رازی نامہ ءُ سلاھ کاری ئے دیوان برجم دارگ بوتگ۔ اے دیوان ءَ دینی زانتکاران ءُ با بہروسہ ایں مردمان ءَ بید، کماش، اسپیت ریشان ءُ واش ءِ شورا ئے نمایندگ ءُ دمگ ءِ مزنیں مردمان ءَ ھم بہر زورتگ۔ اے دیوان ءَ پد چہ ھبر ھال ءُ میانجی گری ءَ دوئیں نیمگ ءِ مردم پہ سلاھ ءُ رازی نامہ ءَ تیار بوتگ اَنت ءُ گوستگیں جیڑہ آں شموشتگ ءُ براتی ءِ کرار اِش بستگ.
دیوان ءَ بلوچ کبیلہ آنے میان ءَ سلاھ کاری ئے زلورت، اُپار ئے بَرَگ ءُ تُپاکی ءِ سرا زور دیگ بوتگ ءُ اے کار پہ جیڑہ آنے سِندگ ءَ چہ بلوچانے کُہنیں دود ءُ رُبیدگ آں مسالی زانتگ.
دیوان ءِ نندوکان ءَ پہ رازی نامے کنگ ءَ دوئیں نیمگ ءِ مردمانے منّت گپتگ اَنت، ھمیں وڑا آیان ءَ کماش ءُ مزنیں مردمانے جُھد ءَ پہ اے سلاھ کاری ءَ ساڑاتگ.
گُڑسرا، سلاھ کاری ءُ رازی نامے کاگد پہ سرکاری وڑ ءُ پیم ءَ وانگ بوتگ ءُ ٹکّر زوروکانی نمایندگان ءَ دسھت کرتگ۔ اَڑتگیں مردمان ءَ گوں بلوچے دود ءُ ربیدگ آں وشّان بوتگ اَنت۔ اے دیوان پہ واش ءِ مردمانے میان ءَ سلاھ ءُ براتی ءُ گوں یکّا دگرا ھور بیئگ ءِ دوآ ءَ آسر بوتگ.
Be the first to comment