رَسانک نیوز/ جمے روچ 18 مہر ماہ 1404 ءَ، سرباز ءَ راسک ءِ زِلّھ ءَ، سرباز ءِ کور ئے ھاکے راہ ءَ سپاہ ءِ پاسداران ءِ نزامے ٹولی ءِ بلوچے ٹیلکشّے گاڑی ئے سرا تیرگواری ءَ، ڈریور ءَ تیر وارتگ ءُ ٹپیگ بوتگ.
ٹپیگ بوتگیں بلوچے ٹیلکشّئے پجّار «بسیر برشان»، 17 سالگ، مھمدسدّیک ءِ چُک، بُندر ءَ راسک ءِ جنگل دمگ ءِ نندوک زانگ بوتگ.
ھال سرکنوکان ءَ گوشتگ: نزامی ٹولی ءَ ھماں وھدا کہ بسیر وتی لوگ ءَ واتر کنگ ءَ بوتگ ءُ گاڑی ءِ بار، ھالیکیں گیلن بوتگ، نزامی ٹولی ءَ گاڑی ءِسرا تیرگواری کرتگ کہ آئی ءَ سرین ءَ تیر وارتگ ءُ ٹپیگ بوتگ.
رَسانک ءِ ھال سرکنوکانے رِد ءَ، نزامی ٹولی ءِ پکّائیں جادہ ءِ سرا چیک پوسٹ ءِ لِک کنگ ءُ راہ ءِ بندگ ءَ بسیر چہ ناچاری کور ئے ھاکی راہ گپتگ ءُ دیم پہ وتی لوگ ءَ روگ ءَ بوتگ کہ نزامی ٹولی ءَ آئی ءِ سرا تیرگواری کرتگ ءُ نسیر ءَ ماں سرین ءَ تیر وارتگ ءُ ٹپیگ بوتگ.
ھال سرکنوکان ءَ گوشتگ: تیرگواری ءَ پد، دمگ ءِ نندوکیں مردمان ءَ ٹپیگ بوتگیں بلوچے ٹیلکشّ ءَ پہ درمان ءَ راسک ءِ ولایت نادراہجاہ ءَ سر کرتگ ءُ نزامی ٹولی ھم چہ جاہ ءَ در شُتگ.
نزامی ٹولی آنے ماں کور ءُ ھاکے راہ آں بلوچے ٹیلکشّ آنے سرا تیرگواری کہ چہ ماشی ءُ مالی جنجال آں اے کارا دیمش کرتگ، زمہ وارانے پہ ایمنی ءِ ھالات ءِ تُرند کنگ ءَ پیسر بوھگ ءُ پہ مالی ءُ ماشی جنجال آنے سِندگ ءَ دلگوش نہ بئیگ ءَ درا کنت.
Be the first to comment