چھبار ءِ بندیگجاہ ءَ اینستاگرامے پتّر ءَ بلاگرے، پد چہ ھشتاد ءُ ھشت روچ بندیگ بوھگ ءَ زمانت ءِ سرا آجو بوتگ

رَسانک نیوز/ 9 مہر ماہ 1404 ءَ، جنیں چُکے کہ سوشل میڈیا ئے اینستاگرامے پتّر ءَ بلاگر ءُ جُھد کارے بوتگ، ماں تاریک 16 تیر ماہ ءَ پہ کوش ءِ الزام ءَ دزگیر بوتگ ءُ آئی ءِ سجھیں پست چہ اینستاگرامے تاک ءَ دیئر کنگ بوتگ اَنت۔ اے بلوچے سوشل میڈیا ئے جُھد کار پد چہ ھشتاد ءُ ھشت روچ بندیگ بوھگ ءَ زمانت ءِ سرا چہ چھبار ءِ بندیگجاہ ءَ آجو بوتگ.

اے بلوچے جنیں زھگے پجّار بانوک «ف۔خ (ج)»، 20 سالگ، مھمدرھیم ءِ چُک، بُندر ءَ بمپور ءُ انّیگیں وھدا چھبار ءِ جھمنند زانگ بوتگ.

دیمترا رَسانک ءِ ھال سرکنوکان ءَ گوشتگ: 13 تیر ماہ 1404 ءِ شپ ءَ بلوچے ورنایی کہ آئی ءِ پجّار «مھدی پارسا»، 25 سالگ، الی ئے چُک، چھبار ءِ تیس دمگ ءِ نندوک زانگ بوتگ۔ چھبار ءَ نندوکیں ماڑی یے سئے اُمیں منزل ءَ چی، گُمانداریں وڑی ءَ جہلاد ءَ کپتگ ءُ ساہ داتگ۔ ویلے سئے اُمیں روچ ءَ بلوچے جنیں چُکے پہ ھمیں کوش ءِ الزام ءَ دزگیر بوتگ.

سربوتگیں پیسریگیں ھال آنے رِد ءَ، ساہ داتگیں بلوچے ورنا ماڑی ئے واھُند بوتگ ءُ دیمترا گوں اے بلوچے جنیں آدم ءَ ھور بوتگ۔ اے ویل ءِ سرا دمگے نندوکیں مردمان ءَ اِشتاپے ءَ پد کرد داتگ، چہ بُرزا چگل دیگ بوتگیں مرد ءَ آپریشن ئے کوٹی ءَ سر بوھگ ءَ پیسر ساہ داتگ.