ریک ملک ئے نندوکیں مردمان ءَ پہ مالی جاور آں زھر شانے کرتگ ءُ گوشتگ میرجاوہ ءِ روتک ئے سیمسراں پدا پچ کنگ بہ بنت

رَسانک نیوز/ چارشمبے 2 مہر ماہ 1404 ءَ، لہتیں چہ ریک ملک ءِ جھمنندیں مردماں پہ مالی جاور آن ءُ مالی جنجال آں، جارتاک شنگ کرتگ۔ آیان ءَ روتک ءِ سیمسراں بند بوھگ ءِ بابت ءَ بیہار داتگ ءُ چہ زمہ واران ءَ لوٹتگ کہ آیانے مالی جنجال ءُ جیڑہ آں بہ سِند اَنت۔ اے جارتاک ئے یک بہرے رَسانک ءَ ھم سربوتگ.

اے جارتاک ءَ گوشگ بوتگ: سیمسر آنے دیواراں لک اِتگ ھچ اِبادتے ءَ چہ مھلوکے ھزمت کنگ ءَ گیشتر اردشت نیست، بلے راستی دگہ وڑیں سیمسراں نندوکیں مردماں بے روزگار اَنت، چہ مالی پیدا وار پَشت کپتگ اَنت ءُ آیانے پَر زونگ ھالیگ اَنت۔ ریک ملک ءُ اے دگہ نزّیکیں دمگانے نندوکیں مردمان ءَ گوشتگ چہ روتک ءِ سیمسراں بندگ ءَ ھزاراں ھاندانے زندماں گوں ھترا دیمپاں کرتگ، جاور ھمیں پیم ءَ دیما برو اَت زندمانے کنٹرول ءُ برداشت چہ وس ءَ ڈنّ بیت.

آیان ءَ لوٹتگ کہ روتک ءِ سیمسراں پیسریگیں وڑا پچ کنگ بہ بنت، ناکار آمدیں سیاست آنے چُش کہ زابلے سیاست ءِ کارمرز کنگ منّگ نہ بنت.

جارتاک ءِ لکّوک آن ءَ چہ زمہ واران ءَ لوٹتگ: ھُشکیں گپّ ءُ کول آں یلا بہ کن اَنت ءُ مردمانے لوٹ ءِ سرا کار بہ کن اَنت۔ اے جارتاک ءَ سیمسراں نندوکیں مردمانے دلیری ءُ اُوشت ساڑینگ بوتگ ءُ زور داتگ: اے مردم ماں چلّے زمستان ءَ، نپس بُرّیں گرم ءَ، گوات ءُ ھوراں، گوں دلیری ءُ اُوشت ءَ چہ سیمسراں ھیالدارے کرتگ، مہربانے بہ کنیت سیمسراں نندوکیں مردمانے مھنت آں مان بہ یار اِیت ءُ آیانی ھکّ ءَ بہ منّیت.

گوشگ لوٹیت: میر جاوہ ئے روتک ءِ سیمسراں پنچ ماہ ءَ بُرز اِنت کہ سپاہ ءَ بستگ اَنت، سپاہ ئے اے ناشریں کاراں دہ آں ھزار جھمنند چہ کار ءُ روزگار ءَ دور داتگ۔ لہتیں چہ اے جھمننداں بیکارانے کچ ءَ ھور اَنت ءُ لہتیں ھماں پت آنے کچّ ءَ ھور اَنت کہ وتی زھگان ءَ وانگجاہ ءَ دیم دات نہ کن اَنت۔ اے جاور ءَ مالی ءُ سماجی زور ھاندان آنے سرا گیش کرتگ.