رَسانک نیوز/ جمے روچ ءَ 14 شہریور ماہ 1404 ءَ، شہریور ءِ دومیں ھپتگ ءَ بلوچے کہ نزامی ٹولی ءَ دزگیر کرتگ ءُ یزد ئے بندیگجاہ ءَ داشتگ چہ دل ءِ اُوشت ءَ ساہ داتگ۔ آئی ءِ بے ساھیں جون مرک ءَ سئے روچ ءَ پد لوگے مردمان ءَ دیگ بوتگ۔ اے ویل ھماں وھدا پیش اَتکگ کہ آئی ءِ لوگے مردم چہ بندیگجاہ ءِ زمہ وارانے بے پرواھی ءَ گِلَگ کرتگ.
جُھد کاریں بلوچانے کمپین ءَ اے بلوچے پجّار «پرھاد کبدانے»، 22 سالگ، ھدارھم ئے چُک، بُندر ءَ دُزاپ ءِ بازار مشترک ءِ نندوک ءُ انّیگیں وھدا یزد ءَ ابر کوہ ئے جھمنندے زانتگ.
اے ھالے رِد ءَ، پرھاد ءَ وتی سنگت ئے بے کاگدیں پٹ پٹی ءَ سوار بوھگ ءُ کارمرز کنگ ءِ وھدا، نزامی ٹولی ءَ پہ دُزّی ئے الزام ءَ دزگیر کرتگ۔ آئی ءَ گوشتگ: من ءَ زمانتے سرا آجو بہ کنیت داں کہ من اے پٹ پٹی ئے واھُند ءَ شمئے دست ءَ بہ دیاں، بلے نزامی ٹولی ءَ پرھاد ئے اے گپّ نہ منّتگ.
ھال زانوک آن ءَ گوشتگ: نزامی ٹولی ءَ بازیں جُست ءُ پُرس ءَ پد پرھاد ءَ یزد ئے بندیگجاہ ءَ داتگ۔ سئے شمبے روچ ءَ 11 شہریور ءَ بید چہ پیسرگیں نادراھی ءَ اَچانک ءَ پرھاد ءَ دل ءَ گپتگ ءُ نادراہجاہ ءَ سر کنگ بوتگ۔ گُڑ سرا پرھاد ءَ جمے روچ ءَ 14 شہریور ءَ یزد ئے نادراہجاہ ءَ ساہ داتگ۔ آئی ءِ بے ساھیں جون کانونی ڈاکٹر آنے دست ءَ دیگ بوتگ.
گوشتگ اِش: پرھاد ءِ مات وتی چُک ئے مرگ ءَ پد، یزد ءِ بندیگجاہ ءَ شُتگ ءُ زھر شانے کرتگ، بلے بندیگجاہ ءِ زمہ واران ءُ مستر آن ءَ پسّو نہ داتگ.
Be the first to comment