پہرہ ئے بمپور دمگ ءَ چیریں ادارے ٹولی ءُ کارمند بلوچے ٹیلکش آنے سرا تیرگواری کرتگ ءُ جول ءُ رشوت گپتگ

رَسانک نیوز/ شمبے روچ ءَ 1 شہریور ماہ 1404 ءَ، پہرہ ئے بمپور دمگے بازار ءَ انتزامی ادارے چیریں ٹولی ئے کارمندان ءَ بلوچے ٹیلکش آنے سرا تیرگواری کرتگ. انتزامی باسک ءِ چیریں ٹولی ئے کارمندان ءَ سرہنگ دلاوری ئے ھکم ءُ سروکی ءَ اے تیرگواری کرتگ.

بازین ٹیلکشے ءَ گوشتگ: انتزامی ٹولی ئے ٹیلکش آنے پدا کپگ ءُ آیانی سرا تیرگواری کنگ ءِ پُژدر ٹیلکش آنے در کانونے کار نہ اِنت، بلکے سرہنگ دلاوری ئے دپ وت لوٹتگیں جولے نہ منّگ ءُ نہ دیگ اِنت. سرہنگ دلاوری ءَ ٹیلکش گوشتگ اَنت: ھر ٹیلکشے کہ اے راہ ءَ روگ ءُ آھگ بہ کنت، باید اِنت کہ منی بہر ءَ بہ گیشین اِیت ءُ بہ دنت ٹیلکش آن ءَ گوشتگ: ھماں کہ اے گپّ نہ منّتگ ءُ جول نہ داتگ چیریں ادارے ٹولی ءَ ھمایانے سرا تیرگواری کرتگ.

اے زلم ءُ زوراکی بلوچے ٹیلکش آنے سرا ھمیں وھدا بوھگ اِنت کہ آیاں چہ بیکاری ءُ تنگ دستی ءَ پہ ٹیلکشیئے کارا دیم کرتگ ءُ اے کار دست گپتگ. سرکار ءَ باید اِنت کہ پہ بلوچ ورنایان ءَ پکائیں کار ءُ بار ے بندات ءَ ائیر بہ کنت ءُ آیان ءَ کار ے موہ بہ دنت نہ کہ پہ ھژم ءُ تُرندی ءَ انسانے ھکّانی پادلپاش بہ کنت ءُ بلوچے ٹیلکش آنے جان ءَ بیہار بہ دنت.

بمپور ءَ نندوکیں مردمے ءَ اے ویل ئے پد کرد ءَ گوشتگ: چیریں ادارے کارمنداں باید اِنت کہ مزنیں دزان ءُ ھلاپ کنوکان ءَ بہ گِر اَنت نہ کہ بے چارگین ءُ بے وسیں ٹیلکش آنے جان ءَ بیہار بہ دینت. اگاں اِداں کارھانہ ءُ شرکت ے جوڑ بہ بیت ءُ ورنایان ءَ کار ے موہ دیگ بہ بیت، ھچ ورنایی ٹیلے کشّگ ءَ نہ روت.