رَسانک نیوز/ زی 17 مرداد ماہ 1404 ءَ، میرجاوہ ءِ اندہ دمگ ءَ بلوچے کوہ ئے دیم ءَ دستی بمبے چگل دیگ ءَ پد، دستی بمب ءِ چرّہ آئی ءِ لاپ ءَ لگتگ اَنت ءُ سکّ ءَ ٹپیگ بوتگ، دُزاپ ءِ نادراہجاہ ءَ سر بوھگ ءَ چُنت ساھت ءَ پد آئی ءَ ساہ داتگ.
اے بلوچے پجّار «زکریا گمشادزھی» الیم ئے چُک، میرجاوہ ئے اندہ دمگ ءِ نندوک زانگ بوتگ.
رَسانک ءِ ھال سرکنوکان ءَ گوشتگ: زکریا ئے پت چہ سپاہ ءُ سرکارے ادارہ آنے با اسریں مردماں زانگ بیت ءُ اے دستی بمب آں آیان ءَ چہ ھمیں امنیتی ادارہ آں دست کپتگ اَنت، آئی ءَ دستی بمب کوہ ئے دیم ءَ چگل داتگ، بلے چہ دستی بمب ءِ تراکے جاہ ءَ دور نہ روگ ءَ آئی ءَ ماں لاپ ءَ چرّہ لگتگ ءُ سکّ ءَ ٹپیگ بوتگ.
زکریا ئے سیاد ءُ مردمان ءَ وھدے سرا آئی ءَ دُزاپ ءِ ھاتم نادراہجاہ ءَ سر کرتگ، بلے ٹپّانے باز بوھگ ءُ بازیں ھونے ریچگ ءَ آ ئی ءَ ساہ داتگ.
Be the first to comment