رَسانک نیوز/ سئےشمبے 14 مرداد ماہ 1404 ءَ، واش ءِ سیّاد شیرازی روڈ ءَ سلاہ بندیں مردمان ءَ بلوچے ئے سرا تیرگواری کرتگ ءُ آئی ءَ ماں گردن ءَ تیر وارتگ ءُ کُشگ بوتگ.
رَسانک ءَ اے بلوچے پجّار «میسم بھادری (شھلی‌بر)»، بھنام ئے چُک، واش ءِ نندوکیں مردمے زانتگ.
رَسانک ءِ ھال سرکنوکان ءَ گوشتگ: گاڑی ئے سلاہ بندیں نندوکان ءَ واش ءِ سیّاد شیرازی روڈ ءَ اے بلوچے سرا تیرگواری کرتگ ءُ تیر ماں آئی ءِ گردن ءَ لگتگ ءُ بازیں ھونے ریچگ ءَ آئی ءَ ساہ داتگ ءُ جنوکاں چہ جاہ ءَ دَر شُتگ اَنت.
گوشگ بوتگ: میسم ئے ھاندان چہ واش ءِ وانندگیں مردماں زانگ بنت ءُ آئی ءِ پت وھدے ءَ واش ءِ شوراے بہر بوتگ ءُ آیان ءَ گوں کسی ءَ دُژمنی ءُ دے گری نہ بوتگ.
واش ءَ انّیگیں وھدا ایمنی ئے نہ بوھگ ءُ کبیلہ آنے میان ءَ جنگ ءُ ھون ریچی ئے گیش بوھگے زمہ وار واش ءِ اِنساپ ءِ ادارہ ئے سروک ءُ کار مستر جواد کیھا زانگ بیت. آئی ءَ گوں ءَ اِنساپے ئے گیش کنگ، بندیگے مردمانے ھاندان آں پہ ھکیریں چمّ ءَ چارگ، انسانی ھکّانی پادلپاش کنگ ءَ گوں کُٹھمدان آنے میان ءَ اَڑ ءُ جیڑ گیش کرتگ.
Be the first to comment