واش ءَ دو کُٹھمدان ئے میان ءَ جیڑہ ءُ ٹکّر ءَ جنیں آدمے ءَ ھور لہتیں مردم کُشگ، ٹپیگ ءُ آوار جنگ بوتگ

رَسانک نیوز/ شمبے روچ 4 مرداد ماہ 1404 ءَ، واش ءَ پشت کوہ ئے پیزآباد دمگ ءَ، دو کُٹھمدان ءِ میان ءَ سلاہ بندیں جیڑہ ءُ ٹکّر ئے ءَ جنیں آدمے کُشگ ءُ دو ورنا ٹپیگ ءُ یک دگہ ورنایی ءَ سلاہ بندیں مردمان ءَ آوار جتگ.

رسانک ءِ ھال سرکنوکان ءَ گوشتگ: جنیں آدمے کہ آئی ءِ پجّار «ز – شھلی‌بر»، 34 سالگ، تاج‌مھمد ءِ چُک زانگ بوتگ، اے ٹکّر ءَ کُشگ بوتگ، یکّے چہ ٹپیگ بوتگیں بلوچانے پجّار «مھمد ریگی»، 18 سالگ، مجیدئے چُک، داں اے وھدا آدگہ ٹپیگ بوتگیں بلوچے پجّار زانگ نہ بوتگ.

اے سلاہ بندیں ٹکّر ءَ بلوچے ورنایی کہ آئی ءِ پجّار «ابوبکر شھنوازی»، 18 سالگ، یارمھمد ءِ چُک، واش ءِ نندوکیں مردمے زانگ بوتگ، دیمیں نیمگے مردمان ءَ آوار جتگ.

ھال سرکنوکان ءَ گوشتگ: پد چہ ایشی ءَ کہ سلاہ بندیں مردمان ءَ ابوبکر آوار جتگ، آئی ءِ سیاد ءُ مردمان ءَ، اے ویل ءِ پد کرد ءَ پیزآباد دمگ ءِ سرا اُرش کرتگ ءُ آیانی تیرگواری ءَ جنیں آدمے کُشگ ءُ دو دگہ ٹپیگ بوتگ.

گوشگ بوتگ: اے ٹکّر ئے پُژدر دوئیں کُٹھمدان آنے میان ءَ کُہنیں اَڑ ءُ جیڑے بوتگ۔ بلے کار آمدیں میانجی گری ءُ سلاھ کنوک ئے نہ بوھگ ءَ اے جیڑہ ءَ انسانی جان گپتگ ءُ دمگ ءِ ایمنی ءِ ھالات ھراب کرتگ.