راسک ءَ امنیتی باسک ئے کمین ءَ کپگ ءُ ٹکّر ءَ، دو بلوچ کُشگ ءُ ٹپیگ ءُ دزگیر کنگ بوتگ ءُ امنیتی باسک ءِ سئے کارمند ٹپیگ بوتگ

رَسانک نیوز/ شمبے روچ 28 تیر ماہ 1404 ءَ، راسک ءَ پارودئے دو راھی ءَ دو بلوچے گاڑی، امنیتی باسک ئے کمین ءَ کپگ ءَ پد، آیان ءَ گوں امنیتی باسک ءَ ٹکّر زورتگ ءُ دوئیں دیمان ءَ تیرگواری کرتگ. اے تیرگواری ءَ بلوچے کُشگ ءُ آئی ءِ ھمراہ ٹپیگ بوھگ ءَ پد، امنیتی باسک ءَ دزگیر کرتگ. اے ٹکّر ءَ امنیتی باسک ءِ سئے کارمند ٹپیگ بوتگ.

رَسانک ءَ کُشگ بوتگیں بلوچے پجّار «شهرام وتن ھا»، 26 سالگ، ملک‌ئے چُک، سرباز ءَ نسیرآباد دمگ ئے نندوک، ٹپیگ ءُ دزگیر بوتگیں بلوچے پجّار «بلال بهرامزھی پاک»، 25 سالگ، نبی بکش ءِ چُک نسیرآباد ءَ رُستگ ءُ ھمیں دمگے نندوکیں مردمے زانتگ.

رَسانک ءِ ھال سرکنوکان ءَ گوشتگ: شهرام وتی ھمراہ بلال ئے ھوری ءَ پہ زاتی کارانے ٹاھینگ ءَ پیشن ءَ شُتگ ءُ پَچ ترَّگ ئے وھدا، پارودئے دو راھی ءَ امنیتی باسک ءِ کمین ءَ کپتگ اَنت ءُ امنیتی باسک ءِ ٹولی ءَ بے جار ءُ توار ءَ آیانی سرا تَچکیں تیرگواری کرتگ. آیاں ھم پہ وتی ساہ ئے رکّینگ ءَ امنیتی باسک ءَ گوں ٹکّر زورتگ، اے پیم ءَ چہ دوئیں دیماں تیرگواری بوتگ. دو دیمیں تیرگواری ءَ شهرام ءَ تیر وارتگ ءُ جاہ ءَ ساہ داتگ. آئی ءِ ھمراہ ءَ ھم تیر وارتگ ءُ سکّ ءَ ٹپیگ بوتگ.

امنیتی باسک ءَ آئی دزگیر کرتگ ءُ پہ درمان ءَ راسک ئے نادراہجاہ ءَ سر کرتگ. اے ٹکّر ءُ دو دیمیں تیرگواری ءَ امنیتی باسک ءِ سئے کارمند ٹپیگ بوتگ. گوشگ لوٹیت‌ که امنیتی باسک ءَ شهرام ئے بے ساھیں جون ءُ آئی ءِ ھالیگیں گاڑی ءَ گوں وت ئا چیریں جاگهے برتگ.

امنیتی باسک ءِ سروکان ءَ شهرامے سیاد ءُ لوگے مردم کہ آئی ءِ بے ساھیں جون ئے دست گِرَگ ءَ راسک ءَ شُتگ اَنت گوشتگ: شهرامے بے ساھیں جون ئے دست گِرَگ ءَ یکشمبے روچ 29 تیر ماہ ءَ بیا اَنت. داں اے ساھت ءَ، امنیتی باسک ئے بے رھبندین ءُ وت سریں تیرگواری ئے پژدر زانگ نہ بوتگ.

رپوٹ آنے نئز آرگ ءَ اے گپّ درا کرتگ ماں سال 2024 ءَ، امنیتی باسک ءِ کاروائی ءُ تیرگواری ءَ 208 بلوچ کُشگ ءُ ٹپیگ بوتگ. آیانی میان ءَ 115 بلوچ ءَ ساہ داتگ ءُ 93 دگہ ٹپیگ بوتگ. کُشگ بوتگیں بلوچانے میان ءَ 13 چُک ءُ 4 جنیں آدم ھور اَنت ءُ ٹپیگ بوتگیں بلوچانے میان ءَ 20 چُک ءُ 12 جنیں آدم ھور اَنت.