چھبار ءَ، سپاہ ءِ چیریں ادارہ ءَ بلوچے آوار جتگ ءُ بیگواہ کرتگ

رَسانک نیوز/ شمبے 21 تیر ماہ 1404 ءَ، چھبار ءَ کمب ءِ دمگ ءَ سپاہ ءِ چیریں ادارہ ءَ بلوچے ءَ دزگیر کرتگ ءُ چیریں جاگہے برتگ.

اے بلوچے پجّار «مھیم (مُئین) رھمت زھی نیا»، 27 سالگ، مھمدالی ءِ چُک، آروس کرتگ، بُندر ءَ آھورانے گہ ئے مردمے ءُ انّیگیں وھدا چھبار ءِ کمب ءِ دمگ ءَ جھمنند بوتگ.

رَسانک ءِ ھال سرکنوکان ءَ گوشتگ: سپاہ ءِ چیریں ادارہ ءَ اے بلوچ ھماں وھدا آوار جتگ کہ آئی سودائے زورگ ءَ دکّان ءَ شُتگ، سپاہ ءِ چیریں ادارے ٹولی گوں زاتی گُدان ءُ زاتی نمبر پلیٹیں گاڑیاں آئی ئے دیم داشتگ ءُ دزگیر کنگ ءَ پد، چیریں جاگہے برتگ.

اے بلوچے دزگیر کنگ ءُ آوار جنگ ءَ چار روچ گوستگ، بلے داں انگت ءَ آئی ءِ ھالے سرپدئے دست ءَ نہ کپتگ. مھیم ئے لوگے مردمان ءَ امنیتی ادارہ ءَ پہ آئی ءِ ھالے سرپدئےآ شُتگ اَنت، بلے آیان ءَ تَچکیں ءُ پکّائیں ھالے دست نہ کپتگ، اے گپّ ءَ مھیم ئے لوگے مردم گیشتر دل پریشاں کرتگ.