چھبار ءَ، تیاب روڈ ءَ سلاہ بندیں مردے ئے گوں امنیتی باسک ءَ ٹکّر ءُ تیرگواری ءَ امنیتی باسک ءِ سئے کارمند کُشگ بوتگ

رَسانک نیوز/ زی جُمے 20 تیر ماہ 1404 ءَ، چھبار ءِ تیاب روڈ ءَ سلاہ بندیں مردے امنیتی باسک ءِ دو توتا ھایلوکس گاڑئے سرا اُرش کرتگ، اے اُرش ءَ امنیتی باسک ءِ 3 کارمند کُشگ بوتگ. اُرش کنوکیں سلاہ بندیں مرد، تیرگواری ءُ امنیتی باسک ءِ کارمندان ءِ کُشگ ءَ پد، جاہ ءَ اُشتاتگ ءُ گوں نوک رستگیں امنیتی ٹولی ءَ ٹکّر زورتگ.

اے ھال ءِ رِد ءَ، اُرش کنوکیں مرد ءَ، امنیتی باسک ءِ دو گاڑئے سرا اُرش ءَ پد جاہ ءَ اُشتاتگ ءُ گوں نوک دیم دیگ بوتگیں امنیتی ٹولی ءَ ٹکّر زورتگ ءُ داں اے وھدا چہ دوئیں دیما تیرگواری بوھگ اِنت.

داں انگت ءَ اُرش کنوکیں مرد ءُ کُشگ بوتگیں کارمندانے پجّار زانگ نہ بوتگ، دگہ گیشیں ھالے اے بابت ءَ دست نہ کپتگ.

تیاب روڈ ءَ، امنیتی باسک ءَ بستگ ءُ جھمننداں پہ روگ ءُ آھگ ءَ دل سیاہ اَنت. اے ٹکّر ءُ اُرش ءِ سرا سرکار ءِ آئوکیں امنیتی پد کرد، جھمننداں سکّ ءَ دل پریشاں کرتگ.